വാഷിങ്ടൺ: ഇറാനെതിരായ സൈനിക നടപടികൾ തുടരുന്നതിനിടെ അമേരിക്കൻ പ്രസിഡന്റ് ഡോണാൾഡ് ട്രംപിനെതിരെ ഡെമോക്രാറ്റിക് സെനറ്റർമാരുടെ രൂക്ഷവിമർശനം. പശ്ചിമേഷ്യയിലേക്ക് കൂടുതൽ സൈന്യത്തെ അയക്കുന്നതിനെയും യുദ്ധം മൂലമുണ്ടാകുന്ന കടുത്ത സാമ്പത്തിക പ്രതിസന്ധികളെയും ചൂണ്ടിക്കാട്ടിയാണ് പ്രതിഷേധം ശക്തമാകുന്നത്. ഇറാനിലേക്ക് 10,000 സൈനികരെ കൂടി വിന്യസിക്കാനുള്ള നീക്കത്തെ സെനറ്റർ ക്രിസ് വാൻ ഹോളൻ കടുപ്പത്തിൽ വിമർശിച്ചു. സൈനികരുടെ മരണസംഖ്യ സംബന്ധിച്ച വിവരങ്ങൾ ഭരണകൂടം മറച്ചുവെക്കുകയാണെന്ന് ആരോപിച്ച അദ്ദേഹം, സൈനിക നീക്കങ്ങൾക്കുള്ള ഫണ്ട് യു.എസ് കോൺഗ്രസ് തടയണമെന്ന് ആവശ്യപ്പെടുകയും ചെയ്തു.
യുദ്ധത്തെ തുടർന്ന് രാജ്യത്ത് ഇന്ധനവില കുത്തനെ ഉയർന്നത് അമേരിക്കയിലെ രാഷ്ട്രീയ ചർച്ചകളിൽ പ്രധാന വിഷയമായി മാറിയിരിക്കുകയാണ്. ഡീസൽ വില മുൻപത്തേതിനേക്കാൾ രണ്ടിരട്ടിയോളം വർദ്ധിച്ചതോടെ കർഷകർ, ഗതാഗത മേഖല, ചെറുകിട ബിസിനസുകൾ എന്നിവരെല്ലാം കടുത്ത പ്രതിസന്ധിയിലാണ്. യുദ്ധച്ചെലവുകളും വിലക്കയറ്റവും സാധാരണക്കാരുടെ ജീവിതത്തെ ബാധിക്കുന്ന സാഹചര്യത്തിൽ, ഇറാനിലെ സൈനിക നടപടികൾക്കുള്ള ചെലവുകൾ വ്യക്തമാക്കണമെന്ന് സെനറ്റർ ക്രിസ് മർഫിയും ആവശ്യപ്പെട്ടു. ഇതിനിടെ ഹോർമൂസ് കടലിടുക്കിൽ കുവൈത്ത് പതാകയുള്ള എണ്ണക്കപ്പലിന് നേരെ ആക്രമണമുണ്ടാകുകയും കപ്പലിന് തീപിടിക്കുകയും ചെയ്തു. കപ്പലിലുണ്ടായിരുന്ന അഞ്ച് ഇന്ത്യൻ പൗരന്മാരെ ഒമാനിലെത്തിച്ച് മസ്കറ്റിലെ ഇന്ത്യൻ എംബസി സുരക്ഷിതരാക്കിയിട്ടുണ്ട്.
പശ്ചിമേഷ്യയിലെ സംഘർഷവും വാണിജ്യ-എണ്ണക്കപ്പലുകൾക്ക് നേരെയുള്ള ആക്രമണങ്ങളും കാരണം ആഗോള ഊർജ്ജ വിതരണം തടസ്സപ്പെട്ടതോടെ, വിലക്കയറ്റം നിയന്ത്രിക്കാൻ ജി-7 (G-7) രാജ്യങ്ങൾ അടിയന്തര ഇടപെടൽ തുടങ്ങി. കരുതൽ ശേഖരത്തിൽ നിന്ന് 100 ദശലക്ഷം ബാരൽ എണ്ണയും ഇന്ധന ഉൽപ്പന്നങ്ങളും വിപണിയിലിറക്കാനാണ് ജി-7 തീരുമാനം. സൈനിക നടപടി തുടരണമോ അതോ നയതന്ത്ര പരിഹാരത്തിലേക്ക് നീങ്ങണമോ എന്ന കാര്യത്തിൽ യു.എസിൽ തർക്കം മുറുകുമ്പോൾ, യുദ്ധം നീളുന്നതും സാമ്പത്തിക സമ്മർദ്ദവും ട്രംപ് ഭരണകൂടത്തിന് വലിയ രാഷ്ട്രീയ വെല്ലുവിളിയായി മാറിയിട്ടുണ്ട്.
