ജറൂസലേം: ഇസ്രായേൽ പൊതുതിരഞ്ഞെടുപ്പിലെ എക്സിറ്റ് പോൾ ഫലങ്ങൾ പുറത്തുവന്നതിന് പിന്നാലെ പ്രതിപക്ഷ പാർട്ടികൾക്കും അറബ് പാർട്ടികൾക്കുമെതിരെ കടുത്ത ആക്രമണവുമായി പ്രധാനമന്ത്രി ബെഞ്ചമിൻ നെതന്യാഹു. കേവലഭൂരിപക്ഷം തികയ്ക്കാൻ പ്രതിപക്ഷം ഇസ്രായേലിലെ അറബ് രാഷ്ട്രീയ പാർട്ടികളെ ആശ്രയിക്കാൻ ശ്രമിക്കുകയാണെന്ന് ആരോപിച്ച അദ്ദേഹം, രാജ്യത്തിന് ശക്തമായ ഒരു “സീയോണിസ്റ്റ് ഭൂരിപക്ഷം” (Zionist Majority) മാത്രമാണ് ആവശ്യമെന്ന് വ്യക്തമാക്കി.
ഇസ്രായേലിന്റെ നിലനിൽപ്പിനെത്തന്നെ എതിർക്കുന്ന അറബ് പാർട്ടികളുടെ പിന്തുണയോടെ ഭരണം പിടിക്കാൻ ശ്രമിക്കുന്നത് അങ്ങേയറ്റം നാണംകെട്ട നടപടിയാണെന്ന് നെതന്യാഹു കുറ്റപ്പെടുത്തി. പ്രതിപക്ഷ സഖ്യത്തിന്റെ നീക്കങ്ങൾ ഇസ്രായേലി സൈനികരുടെ വീര്യത്തെ ചോർത്തുന്നതാണെന്നും അത് രാജ്യത്തിന്റെ ശത്രുക്കളുടെ താൽപ്പര്യങ്ങളെയാണ് സംരക്ഷിക്കുന്നതെന്നും അദ്ദേഹം ആരോപിച്ചു. ഇത്തരക്കാരുമായി എങ്ങനെയാണ് പ്രതിപക്ഷം സഖ്യമുണ്ടാക്കാൻ തുനിയുന്നതെന്നും ഇനിയൊരിക്കലും സംഭവിക്കാൻ പാടില്ലാത്ത നീക്കമാണിതെന്നും അദ്ദേഹം വ്യക്തമാക്കി.
