പട്ന: ബിഹാർ തെരഞ്ഞെടുപ്പ് ഫലം എൻ.ഡി.എക്ക് അനുകൂലമായതോടെ, വോട്ടെടുപ്പിലെ ഗുരുതരമായ ക്രമക്കേടുകൾ ചൂണ്ടിക്കാട്ടി സി.പി.ഐ (എം.എൽ) ലിബറേഷൻ നേതാവ് ദീപാങ്കർ ഭട്ടാചാര്യ രംഗത്തെത്തി. ഔദ്യോഗിക വോട്ടർപട്ടികയിലുള്ളതിനേക്കാൾ മൂന്ന് ലക്ഷത്തിലധികം ആളുകൾ ബിഹാറിൽ വോട്ട് രേഖപ്പെടുത്തിയെന്ന് അദ്ദേഹം ആരോപിച്ചു. ഈ അധിക വോട്ടുകൾ എവിടെ നിന്ന് വന്നുവെന്ന് തെരഞ്ഞെടുപ്പ് കമ്മീഷൻ (ഇ.സി.ഐ.) വിശദീകരിക്കണമെന്നും ഭട്ടാചാര്യ ആവശ്യപ്പെട്ടു.
എസ്.ഐ.ആർ (വോട്ടർ പട്ടികയുടെ തീവ്ര പരിഷ്കരണം) നടപടിക്രമത്തിന് ശേഷം ബിഹാറിൽ 7.42 കോടി വോട്ടർമാരാണ് ഉണ്ടായിരുന്നതെങ്കിൽ, വോട്ടെടുപ്പിന് ശേഷമുള്ള ഇ.സി.ഐയുടെ പത്രക്കുറിപ്പിൽ ഈ എണ്ണം 7,45,26,858 ആണെന്ന് പറയുന്നു. “പുനരവലോകനത്തിന് ശേഷം ഈ വർധനവ് എങ്ങനെ സംഭവിച്ചു?” എന്ന് അദ്ദേഹം സമൂഹ മാധ്യമമായ ‘എക്സി’ലൂടെ ചോദ്യമുയർത്തി. വോട്ടർ ഡാറ്റയിലെ പൊരുത്തക്കേടുകൾ, പേരുകൾ നീക്കം ചെയ്യൽ, ക്രമക്കേടുകൾ എന്നിവ മുൻപും വ്യാപകമായി വിമർശിക്കപ്പെട്ടിട്ടുള്ള സാഹചര്യത്തിൽ, ഭട്ടാചാര്യയുടെ ഈ ആരോപണം തിരഞ്ഞെടുപ്പ് കമ്മീഷൻ്റെ കണക്കുകൾ വീണ്ടും സൂക്ഷ്മപരിശോധനയ്ക്ക് വിധേയമാക്കാൻ വഴിവെച്ചിരിക്കുകയാണ്.
