ഹോങ്കോങ്: ഹോങ്കോങ്ങിന്റെ വടക്കൻ ജില്ലയായ തായ് പോയിലെ ഒരു റെസിഡൻഷ്യൽ കോംപ്ലക്സിലെ ഉയരമുള്ള കെട്ടിടത്തിൽ ഉണ്ടായ വൻ തീപിടിത്തത്തിൽ മരണസംഖ്യ ഉയരുന്നതായി റിപ്പോർട്ടുകൾ, കുറഞ്ഞത് 14 പേർ മരിക്കുകയും നിരവധി പേർക്ക് ഗുരുതരമായി പരിക്കേൽക്കുകയും ചെയ്തതായി വിവരങ്ങൾ.
31 നിലകളുള്ള അപ്പാർട്ട്മെൻ്റ് ടവറുകളിലാണ് തീ പടർന്നുപിടിച്ചത്. തീപിടിത്തത്തെ തുടർന്ന് കട്ടിയുള്ള കറുത്ത പുകയും തീജ്വാലകളും കെട്ടിടത്തിൽ നിന്ന് ഉയർന്നു. കെട്ടിടത്തിനുള്ളിൽ കൂടുതൽ പേർ കുടുങ്ങിക്കിടക്കുന്നുണ്ടാകാമെന്ന് ഫയർ സർവീസ് വകുപ്പ് മുന്നറിയിപ്പ് നൽകിയിരുന്നു. മരണസംഖ്യ ഇനിയും ഉയരാൻ സാധ്യതയുണ്ട്.
അഗ്നിശമന സേനാംഗങ്ങൾ തീ അണയ്ക്കാനും കെട്ടിടത്തിൽ കുടുങ്ങിയവരെ രക്ഷിക്കാനുമുള്ള തീവ്രശ്രമം തുടരുകയാണ്. ഹോങ്കോങ്ങിനെ നടുക്കിയ ഈ ദുരന്തത്തിൽ, പരിക്കേറ്റവരെ വിവിധ ആശുപത്രികളിൽ പ്രവേശിപ്പിച്ച് ചികിത്സ നൽകുന്നു. സംഭവത്തെക്കുറിച്ച് വിശദമായ അന്വേഷണം നടക്കുകയാണ്.
