ന്യൂഡൽഹി: ഭരണഘടനാ ഭേദഗതി ബില്ലിന്റെ പരാജയത്തിന് പിന്നാലെ രാജ്യത്തെ അഭിസംബോധന ചെയ്ത് പ്രതിപക്ഷത്തെ കടന്നാക്രമിച്ച പ്രധാനമന്ത്രി നരേന്ദ്ര മോദിക്കെതിരെ പാർലമെന്റിൽ അവകാശലംഘന നോട്ടീസ്. എ.ഐ.സി.സി ജനറൽ സെക്രട്ടറി കെ.സി. വേണുഗോപാൽ എം.പി.യാണ് പ്രധാനമന്ത്രിയുടെ നടപടി സഭയോടുള്ള അവഹേളനമാണെന്ന് ചൂണ്ടിക്കാട്ടി ലോക്സഭാ സ്പീക്കർക്ക് നോട്ടീസ് നൽകിയത്. പാർലമെന്റിലെ വോട്ടിങ് നടപടികളെ സഭയ്ക്ക് പുറത്ത് വിമർശിച്ച പ്രധാനമന്ത്രിയുടെ പ്രസംഗം അധികാര ദുർവിനിയോഗമാണെന്നും എം.പിമാരുടെ ഉദ്ദേശ്യശുദ്ധിയെ ചോദ്യം ചെയ്തത് അംഗങ്ങളുടെ പദവിക്ക് നേരെയുള്ള കടന്നുകയറ്റമാണെന്നും നോട്ടീസിൽ പറയുന്നു. ഏപ്രിൽ 18-ന് നടത്തിയ 29 മിനിറ്റ് നീണ്ട പ്രസംഗത്തിൽ ‘കോൺഗ്രസ്’ എന്ന് 50-ഓളം തവണ പരാമർശിച്ച പ്രധാനമന്ത്രി, രാഷ്ട്രീയ താല്പര്യങ്ങൾക്കായി ഭരണഘടനാ പദവി ഉപയോഗിച്ചുവെന്നും പ്രതിപക്ഷം ആരോപിക്കുന്നു.
ഭരണഘടനയുടെ 131-ാം ഭേദഗതി ബിൽ സഭയിൽ പരാജയപ്പെട്ട സാഹചര്യത്തിൽ, അതിന് ഉത്തരവാദികൾ പ്രതിപക്ഷമാണെന്ന് വരുത്തിത്തീർക്കാനാണ് പ്രധാനമന്ത്രി ശ്രമിച്ചതെന്ന് കെ.സി. വേണുഗോപാൽ കുറ്റപ്പെടുത്തി. ഭരണഘടനയുടെ 105-ാം അനുച്ഛേദപ്രകാരം സഭയ്ക്കുള്ളിലെ വോട്ടിങ്ങിന്റെയും നടപടികളുടെയും പേരിൽ അംഗങ്ങളെ പുറത്തുവെച്ച് കുറ്റപ്പെടുത്താൻ ആർക്കും അവകാശമില്ല. സ്ത്രീ സംവരണത്തെ പിന്തുണയ്ക്കുമ്പോഴും, അതിന്റെ മറവിൽ മണ്ഡല പുനർനിർണ്ണയത്തിലെ സുരക്ഷാ മാനദണ്ഡങ്ങൾ അട്ടിമറിക്കാനുള്ള നീക്കത്തെയാണ് പ്രതിപക്ഷം എതിർത്തതെന്ന് അദ്ദേഹം വ്യക്തമാക്കി. ദൂരദർശൻ ഉൾപ്പെടെയുള്ള പൊതു പ്രക്ഷേപണ സംവിധാനങ്ങൾ ദുരുപയോഗം ചെയ്ത് പ്രതിപക്ഷത്തെ വേട്ടയാടുന്നത് തിരഞ്ഞെടുപ്പ് പെരുമാറ്റച്ചട്ടത്തിന്റെ ലംഘനമാണെന്ന് കോൺഗ്രസ് നേതാവ് ജയറാം രമേശും വിമർശിച്ചു.
ബില്ലിനെ എതിർത്തത് സ്ത്രീകളോടുള്ള അപമാനമാണെന്നും ഇതിന് ജനങ്ങൾ വരാനിരിക്കുന്ന തിരഞ്ഞെടുപ്പിൽ ശിക്ഷ നൽകുമെന്നുമാണ് പ്രധാനമന്ത്രി പ്രസംഗത്തിൽ പറഞ്ഞിരുന്നത്. എന്നാൽ, ദക്ഷിണേന്ത്യൻ സംസ്ഥാനങ്ങളുടെ പ്രാതിനിധ്യം കുറയ്ക്കുന്ന രീതിയിലുള്ള മണ്ഡല പുനർനിർണ്ണയ നീക്കങ്ങളെ തടയുകയാണ് ചെയ്തതെന്ന് ഇന്ത്യ മുന്നണി ആവർത്തിച്ചു. സഭയിൽ ഭൂരിപക്ഷം തെളിയിക്കാൻ കഴിയാത്തതിലുള്ള നിരാശയാണ് പ്രധാനമന്ത്രിയുടെ വാക്കുകളിൽ നിഴലിക്കുന്നതെന്നും രാഷ്ട്രീയ പോരാട്ടം വരും ദിവസങ്ങളിൽ സഭയ്ക്കുള്ളിലും പുറത്തും കടുക്കുമെന്നും ഇതോടെ വ്യക്തമായി.
