ന്യൂഡൽഹി: തൃണമൂൽ കോൺഗ്രസ് നേതാവ് മഹുവ മൊയ്ത്രയ്ക്ക് ഇൻഡിഗോ വിമാനത്തിൽ വെച്ച് സഹയാത്രികരിൽ നിന്ന് കടുത്ത അധിക്ഷേപം നേരിടേണ്ടി വന്നതായി പരാതി. കൊൽക്കത്തയിൽ നിന്ന് ഡൽഹിയിലേക്കുള്ള യാത്രയ്ക്കിടെയാണ് തനിക്ക് നേരെ അതിക്രമം ഉണ്ടായതെന്ന് അവർ ആരോപിച്ചു. വിമാനത്തിനുള്ളിൽ വെച്ച് ഒരു കൂട്ടം യാത്രക്കാർ ‘തൃണമൂൽ ചോർ’, ‘ജയ് ശ്രീറാം’ തുടങ്ങിയ മുദ്രാവാക്യങ്ങൾ വിളിക്കുകയും തന്നെ വളരെയധികം ശല്യം ചെയ്യുകയും ചെയ്തതായി മഹുവ എക്സിലൂടെ അറിയിച്ചു. പശ്ചിമ ബംഗാളിലെ തിരഞ്ഞെടുപ്പ് ഫലം പുറത്തുവന്നതിന് പിന്നാലെ രാഷ്ട്രീയ സംഘർഷങ്ങൾ തുടരുന്ന സാഹചര്യത്തിലാണ് ഈ സംഭവം നടന്നത്.
താൻ നിരന്തരമായി അധിക്ഷേപിക്കപ്പെട്ടിട്ടും വിമാനത്തിലെ ജീവനക്കാർ ഇടപെടാനോ ശല്യപ്പെടുത്തിയവരെ നിയന്ത്രിക്കാനോ തയ്യാറായില്ലെന്ന് മഹുവ മൊയ്ത്ര കുറ്റപ്പെടുത്തി. സഹയാത്രികർക്ക് സുരക്ഷ ഉറപ്പാക്കുന്നതിൽ ഇൻഡിഗോ എയർലൈൻസ് പരാജയപ്പെട്ടുവെന്നും അവർ ചൂണ്ടിക്കാട്ടി. സംഭവത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുന്നുണ്ട്. രാഷ്ട്രീയ വിയോജിപ്പുകൾ പ്രകടിപ്പിക്കാൻ യാത്രക്കാരെ ശല്യം ചെയ്യുന്നത് അംഗീകരിക്കാനാവില്ലെന്നും ഇത് സിവിൽ ഏവിയേഷൻ നിയമങ്ങളുടെ ലംഘനമാണെന്നും അവർ കൂട്ടിച്ചേർത്തു. സംഭവത്തെക്കുറിച്ച് എയർലൈൻ അധികൃതർ അന്വേഷണം ആരംഭിച്ചതായാണ് വിവരം.
