അബഹ: പ്രമുഖ പ്രവാസി സന്നദ്ധപ്രവർത്തകനും ഒ.ഐ.സി.സി നേതാവുമായ ഫൈസൽ പൂക്കോട്ടുംപാടം സൗദി അറേബ്യയിൽ ഹൃദയാഘാതം മൂലം മരണപ്പെട്ടു. പൂക്കോട്ടുംപാടം പറയങ്ങാട് താമസിക്കുന്ന പരേതനായ കോഴിക്കോടൻ അഹമ്മദ് ഹാജിയുടെ മകനാണ് ഇദ്ദേഹം. ഒ.ഐ.സി.സി അബഹ റീജിയൻ കമ്മിറ്റി വൈസ് പ്രസിഡന്റായും, ഒ.ഐ.സി.സി നജ്റാൻ ഏരിയ കമ്മിറ്റിയുടെ മീഡിയ കൺവീനറായും സജീവമായി പ്രവർത്തിച്ചു വരികയായിരുന്നു. അബഹ കമീസ് മുശൈത്ത് ഹയാത്ത് ഹോസ്പിറ്റലിൽ വെച്ചായിരുന്നു അന്ത്യം സംഭവിച്ചത്.
നാട്ടിൽ അവധിക്ക് പോയി ലീവ് കഴിഞ്ഞ് വെറും രണ്ട് ദിവസം മുൻപാണ് ഫൈസൽ തിരികെ കമീസ് മുശൈത്തിൽ എത്തിയത്. മടങ്ങിയെത്തിയതിന് തൊട്ടുപിന്നാലെയാണ് അപ്രതീക്ഷിതമായി ഹൃദയാഘാതത്തിന്റെ രൂപത്തിൽ മരണം ഇദ്ദേഹത്തെ തേടിയെത്തിയത്. കഴിഞ്ഞ 15 വർഷത്തോളമായി സൗദിയിൽ പ്രവാസ ജീവിതം നയിക്കുകയായിരുന്നു ഫൈസൽ പൂക്കോട്ടുംപാടം. റിൻഷാ, റിഫ്ന, സൈഫിൻ എന്നിവർ മക്കളാണ്. ഇദ്ദേഹത്തിന്റെ അപ്രതീക്ഷിത വിയോഗം പ്രവാസി മലയാളി കൂട്ടായ്മകൾക്കിടയിലും ജന്മനാട്ടിലും വലിയ ദുഃഖം പടർത്തിയിട്ടുണ്ട്.
