ന്യൂഡൽഹി: സൗത്ത് വെസ്റ്റ് ഡൽഹിയിലെ സത്യനികേതനിൽ അഞ്ചുനില കെട്ടിടം തകർന്നു വീണുണ്ടായ ദാരുണ അപകടത്തിൽ മരിച്ചവരുടെ എണ്ണം ആറായി ഉയർന്നു. അപകടത്തിൽപ്പെട്ട അഞ്ചുപേരെ രക്ഷപ്പെടുത്തിയപ്പോൾ കെട്ടിടാവശിഷ്ടങ്ങൾക്കിടയിൽ ഇനിയും നിരവധിപേർ കുടുങ്ങിക്കിടക്കുന്നതായി സംശയിക്കുന്നു. ഞായറാഴ്ച ഉച്ചയ്ക്ക് 1:30-ഓടെയാണ് അപകടം സംഭവിച്ചത്. ഡൽഹി സർവകലാശാലയുടെ സൗത്ത് ക്യാമ്പസിന് സമീപം വിദ്യാർത്ഥികൾ കൂടുതലായി താമസിക്കുന്ന മേഖലയിലെ തിരക്കേറിയ ഇടവഴിയിലാണ് ഈ കെട്ടിടം സ്ഥിതി ചെയ്തിരുന്നത്. ‘ഹോസ്റ്റൽ ഡെയ്സ്’ എന്നറിയപ്പെട്ടിരുന്ന, 75 കിടക്കകളുള്ള പേയിങ് ഗസ്റ്റ് (പി.ജി) താമസസൗകര്യമായി ഉപയോഗിച്ചിരുന്ന 50 വർഷത്തോളം പഴക്കമുള്ള കെട്ടിടമാണ് പൂർണ്ണമായും നിലംപതിച്ചത്. അപകടസമയത്ത് 30 മുതൽ 40 വരെ ആളുകൾ അകത്തുണ്ടായിരുന്നുവെന്നാണ് ദൃക്സാക്ഷികൾ നൽകുന്ന വിവരം.
കെട്ടിടത്തിന്റെ ബേസ്മെന്റിൽ കഴിഞ്ഞ ഒരു മാസത്തോളമായി അറ്റകുറ്റപ്പണികളും നിർമ്മാണ പ്രവർത്തനങ്ങളും നടന്നിരുന്നതായി പോലീസ് അറിയിച്ചു. തുടർച്ചയായി പെയ്ത മഴയിൽ ഭൂഗർഭ നിലയിൽ വെള്ളം കെട്ടിക്കിടന്നതും ബേസ്മെന്റിലെ നിർമ്മാണവും കെട്ടിടത്തിന് കടുത്ത ബലക്ഷയമുണ്ടാക്കിയതാണ് അപകടത്തിന് കാരണമായതെന്നാണ് പ്രാഥമിക നിഗമനം. അപകടം നടന്ന ഉടൻ സമീപവാസികളും വിദ്യാർത്ഥികളും ചേർന്ന് രക്ഷാപ്രവർത്തനം ആരംഭിക്കുകയും പിന്നാലെ ഡൽഹി പോലീസ്, അഗ്നിരക്ഷാസേന, ദേശീയ ദുരന്തനിവാരണ സേന (എൻ.ഡി.ആർ.എഫ്), ഡൽഹി ഡിസാസ്റ്റർ മാനേജ്മെന്റ് അതോറിറ്റി എന്നിവർ സ്ഥലത്തെത്തി രക്ഷാപ്രവർത്തനം ഏകോപിപ്പിക്കുകയും ചെയ്തു. പ്രദേശം ഇടുങ്ങിയതായതിനാൽ മണ്ണുമാന്തി യന്ത്രങ്ങൾ ഉപയോഗിച്ചുള്ള കോൺക്രീറ്റ് അവശിഷ്ടങ്ങൾ നീക്കൽ പ്രക്രിയ ദുഷ്കരമായി തുടരുകയാണ്.
അപകടത്തിന്റെ ആഘാതത്തിൽ തൊട്ടടുത്ത കെട്ടിടത്തിനും ചെരിവ് സംഭവിച്ചതിനെ തുടർന്ന് മുൻകരുതൽ നടപടിയായി അത് ഒഴിപ്പിച്ചതായി മുഖ്യമന്ത്രി രേഖ ഗുപ്ത അറിയിച്ചു. കുടുങ്ങിക്കിടക്കുന്നവരെ സുരക്ഷിതമായി പുറത്തെത്തിക്കുന്നതിനാണ് സർക്കാരിന്റെ പ്രഥമ പരിഗണനയെന്നും സംഭവത്തിൽ മജിസ്ട്രേറ്റ് തല അന്വേഷണത്തിന് ഉത്തരവിട്ടതായും അവർ വ്യക്തമാക്കി. അപകടത്തിൽ പരിക്കേറ്റവരെ ഡൽഹിയിലെ വിവിധ ആശുപത്രികളിൽ പ്രവേശിപ്പിച്ച് ചികിത്സ നൽകിവരികയാണ്. അതേസമയം സംഭവത്തിൽ ഗുരുഗ്രാം നിവാസിയായ കെട്ടിട ഉടമ ഹരിറാം ബൻസാലിനെതിരെ ഡൽഹി പോലീസ് എഫ്.ഐ.ആർ രജിസ്റ്റർ ചെയ്തു. ഇയാളെ കണ്ടെത്തുന്നതിനായി പ്രത്യേക പോലീസ് സംഘങ്ങളെ നിയോഗിച്ചിട്ടുണ്ടെന്നും അപകടത്തിന് ഉത്തരവാദികളായവർക്കെതിരെ കർശന നടപടി സ്വീകരിക്കുമെന്നും അധികൃതർ വ്യക്തമാക്കി.
