തിരുവനന്തപുരം: സുപ്രീം കോടതി ചീഫ് ജസ്റ്റിസ് സൂര്യകാന്ത് രാജിവെക്കണമെന്ന് ആവശ്യപ്പെട്ട് കെ.പി.സി.സിയുടെ ഔദ്യോഗിക സമൂഹമാധ്യമ പേജിൽ പ്രത്യക്ഷപ്പെട്ട വിവാദ പോസ്റ്റിന് പിന്നാലെ നടപടിയുമായി പാർട്ടി നേതൃത്വം. പോസ്റ്റ് ഷെയർ ചെയ്തതിന് പിന്നിൽ പ്രവർത്തിച്ച വ്യക്തിയെ ജോലിയിൽ നിന്ന് പുറത്താക്കിയതായി കോൺഗ്രസ് നേതാവ് സണ്ണി ജോസഫ് വ്യക്തമാക്കി. സമൂഹമാധ്യമ കൈകാര്യത്തിലെ വീഴ്ച പാർട്ടി ഗൗരവമായി കാണുന്നുവെന്നും തെറ്റായ സന്ദേശം നൽകിയ നടപടി അംഗീകരിക്കാൻ കഴിയില്ലെന്നും നേതൃത്വം അറിയിച്ചു.
വിവാദ പോസ്റ്റ് പ്രത്യക്ഷപ്പെട്ട ഉടൻ തന്നെ പാർട്ടി നേതൃത്വം ഇടപെട്ട് അത് ഔദ്യോഗിക പേജിൽ നിന്ന് നീക്കം ചെയ്തിരുന്നു. എങ്കിലും രാഷ്ട്രീയ കേന്ദ്രങ്ങളിൽ ഇത് വലിയ ചർച്ചകൾക്കും വിമർശനങ്ങൾക്കും വഴിവെച്ചിരുന്നു. ഡൽഹിയിൽ ഇന്ത്യാ മുന്നണിയുടെ നേതൃത്വത്തിൽ ശക്തമായ പ്രക്ഷോഭങ്ങൾ നടക്കുന്നതിനിടെയുണ്ടായ ഈ സോഷ്യൽ മീഡിയ അബദ്ധം വലിയ രാഷ്ട്രീയ വിവാദമായതിനെത്തുടർന്നാണ് പാർട്ടി കർശന നടപടി സ്വീകരിച്ചിരിക്കുന്നത്.
