ന്യൂഡൽഹി: ജാമിയ മില്ലിയ ഇസ്‌ലാമിയ സർവകലാശാലാ പരിസരത്ത് ഭാരതീയ നാഗരിക് സുരക്ഷാ സംഹിത (ബി.എൻ.എസ്.എസ്) സെക്ഷൻ 163 പ്രകാരമുള്ള നിയന്ത്രണങ്ങൾ പ്രാബല്യത്തിൽ വന്നതോടെ ക്യാമ്പസിൽ സംഘർഷാവസ്ഥ. സുരക്ഷാ മുൻകരുതലുകളുടെ ഭാഗമായി കാമ്പസിലേക്ക് കടക്കാനുള്ള ബദൽ വഴികളെല്ലാം അധികൃതർ അടച്ചുപൂട്ടുകയും, ജനങ്ങൾ കൂട്ടംകൂടുന്നതും പ്രതിഷേധ പരിപാടികൾ നടത്തുന്നതും നിരോധിക്കുകയും ചെയ്തു.
കെട്ടിടം ഒഴിഞ്ഞുപോയില്ലെങ്കിൽ കർശന അച്ചടക്കനടപടികളും നിയമപരമായ പ്രത്യാഘാതങ്ങളും നേരിടേണ്ടിവരുമെന്ന് സർവകലാശാലാ അധികൃതർ മുന്നറിയിപ്പ് നൽകിയിരുന്നെങ്കിലും, നൂറോളം വരുന്ന വിദ്യാർത്ഥികൾ ഗുലിസ്താൻ-ഇ-ഗാലിബ് കെട്ടിടത്തിൽ തന്നെ കുത്തിയിരുന്ന് സമരം തുടരുകയാണ്. വൈകുന്നേരത്തോടെ ഗാലിബ് ലോണിൽ നിന്ന് ഗേറ്റ് നമ്പർ ഏഴിലേക്ക് നീങ്ങിയ വിദ്യാർത്ഥികൾ പ്രതിഷേധ പ്രകടനം നടത്തിയെങ്കിലും സുരക്ഷാ ജീവനക്കാർ ഉടൻ ഇടപെട്ട് ഇവരെ തടഞ്ഞു.
പുറംലോകവുമായി യാതൊരു ബന്ധവുമില്ലാത്ത വിധം വിദ്യാർത്ഥികളെ ഒറ്റപ്പെടുത്തിയിരിക്കുകയാണെന്നും, ശൗചാലയങ്ങളിലേക്കുള്ള വെള്ളവും കാന്റീനുകളും അടച്ചുപൂട്ടിയതായും സമരം ചെയ്യുന്നവർ ആരോപിച്ചു. പ്രദേശത്ത് നിരോധനാജ്ഞ നിലനിൽക്കുന്നതിനാൽ അകത്തിരിക്കുന്ന സഹപാഠികൾക്ക് ഭക്ഷണവും കുടിവെള്ളവും എത്തിച്ചുനൽകാൻ പോലും പുറത്തുള്ള വിദ്യാർത്ഥികൾക്ക് സാധിക്കുന്നില്ല. വിഷയത്തിൽ വിദ്യാർത്ഥികളുമായി ചർച്ച നടത്തി പ്രശ്നം രമ്യമായി പരിഹരിക്കാൻ സർവകലാശാലാ ഭരണസമിതി ശ്രമിക്കുന്നുണ്ടെന്നും, സാഹചര്യം ശ്രദ്ധയോടെ നിരീക്ഷിച്ചുവരികയാണെന്നും കേന്ദ്ര വിദ്യാഭ്യാസ മന്ത്രി പ്രഹ്ലാദ് ജോഷി വ്യക്തമാക്കി.
