ടെഹ്റാൻ: മേഖലയിലെ യുദ്ധ സാഹചര്യം ഒഴിവാക്കുന്നതിൽ പന്ത് ഇനി അമേരിക്കയുടെ കോർട്ടിലാണെന്ന് ഇറാൻ പാർലമെന്റ് സ്പീക്കർ മുഹമ്മദ് ബാഖിർ ഖാലിബാഫ്. വാഷിംഗ്ടണിന് കൃത്യവും യുക്തിസഹവുമായ മറുപടി നൽകിയിട്ടുണ്ടെന്നും പുതിയൊരു യുദ്ധം തടയണമോ വേണ്ടയോ എന്ന് അമേരിക്കയാണ് ഇനി തീരുമാനിക്കേണ്ടതെന്നും അദ്ദേഹം വ്യക്തമാക്കി. ഇറാന്റെ തസ്‌നീം വാർത്താ ഏജൻസിയാണ് ഇത് സംബന്ധിച്ച റിപ്പോർട്ട് പുറത്തുവിട്ടത്.
ഇറാനിയൻ കൺസൾട്ടേറ്റീവ് അസംബ്ലിയിലെ പ്രത്യേക യോഗത്തെ അഭിസംബോധന ചെയ്യവെയാണ് ഖാലിബാഫ് വാഷിംഗ്ടണിനെതിരെ ശക്തമായ മുന്നറിയിപ്പുമായി രംഗത്തെത്തിയത്. ട്രിഗറിൽ വിരലമർത്തി ഏതുതരം പോരാട്ടത്തിനും ഇറാൻ സദാസജ്ജമായി നിൽക്കുകയാണെന്ന് മേഖലയിലെ രാജ്യങ്ങൾ മനസ്സിലാക്കണമെന്ന് അദ്ദേഹം ഓർമ്മിപ്പിച്ചു. അമേരിക്ക നൽകിയ നിർദ്ദേശങ്ങൾക്ക് ശക്തവും യുക്തിസഹവുമായ പ്രതികരണമാണ് ഇറാൻ നൽകിയിട്ടുള്ളതെന്നും അദ്ദേഹം കൂട്ടിച്ചേർത്തു.
വാഷിംഗ്ടൺ പുതിയ തന്ത്രപരമായ പിഴവുകൾ വരുത്തിയാൽ, അത് അമേരിക്കൻ സേനയെ പുതിയൊരു യുദ്ധക്കളത്തിലേക്ക് നയിക്കുമെന്ന് അദ്ദേഹം മുന്നറിയിപ്പ് നൽകി. മേഖലയിൽ ഇറാൻ സൈന്യം അതീവ ജാഗ്രത പാലിക്കുന്ന സാഹചര്യത്തിലാണ് പ്രതിരോധ-രാഷ്ട്രീയ നിലപാട് വ്യക്തമാക്കിക്കൊണ്ട് സ്പീക്കറുടെ പ്രസ്താവന വന്നിരിക്കുന്നത്.
