വാഷിങ്ടൺ: മുതിർന്ന ഭരണകൂട ഉദ്യോഗസ്ഥരെയും റിപ്പബ്ലിക്കൻ പാർട്ടി ദാതാക്കളെയും ഇംപീച്ച്‌മെന്റും ജയിൽവാസവും കാണിച്ച് ഡെമോക്രാറ്റിക് നിയമനിർമാതാക്കൾ നിരന്തരം ഭീഷണിപ്പെടുത്തുന്നതായി ആരോപിച്ച് യു.എസ് പ്രസിഡന്റ് ഡോണൾഡ് ട്രംപ് രംഗത്ത്. സംഭവത്തിൽ സമഗ്രമായ അന്വേഷണം നടത്താൻ അദ്ദേഹം നീതിന്യായ വകുപ്പിന് കർശന നിർദ്ദേശം നൽകി. ഡെമോക്രാറ്റുകളുടെ ഈ നടപടികൾ ‘ഏറ്റവും ഉയർന്ന തലത്തിലുള്ള കൊള്ളയടി’ ആണെന്ന് വിശേഷിപ്പിച്ച ട്രംപ്, രാഷ്ട്രീയ പകപോക്കലിന് പിന്നിൽ പ്രവർത്തിച്ചവർ നിയമത്തിന് മുന്നിൽ ഉത്തരം പറയേണ്ടിവരുമെന്നും വ്യക്തമാക്കി.
തന്റെ സോഷ്യൽ മീഡിയ പ്ലാറ്റ്‌ഫോമായ ‘ട്രൂത്ത് സോഷ്യലിൽ’ പങ്കുവെച്ച കുറിപ്പിലാണ് ട്രംപ് ഈ ഗുരുതര ആരോപണങ്ങൾ ഉന്നയിച്ചത്. അറ്റോർണി ജനറൽ ഉൾപ്പെടെയുള്ളവർക്കെതിരെ യാതൊരുവിധ കുറ്റകൃത്യങ്ങളുടെ തെളിവുകളുമില്ലാതെയാണ് ഡെമോക്രാറ്റുകൾ നിരന്തരം ഇംപീച്ച്‌മെന്റ് ഭീഷണി മുഴക്കുന്നതെന്ന് അദ്ദേഹം കുറ്റപ്പെടുത്തി. രാഷ്ട്രീയ നിലപാടുകളുടെ പേരിൽ റിപ്പബ്ലിക്കൻ പാർട്ടിയെ പിന്തുണയ്ക്കുന്ന പ്രമുഖ സാമ്പത്തിക ദാതാക്കളെയും ഡെമോക്രാറ്റുകൾ ലക്ഷ്യമിടുന്നുണ്ടെന്നും, റിപ്പബ്ലിക്കൻ ആയതുകൊണ്ട് മാത്രം മാന്യരായ വ്യക്തികളെ ജയിൽ ശിക്ഷ ഉൾപ്പെടെയുള്ള ഭീഷണികൾക്ക് ഇരയാക്കുകയാണെന്നും ട്രംപ് കൂട്ടിച്ചേർത്തു.
മിഷിഗണിൽ നിന്നുള്ള ഡെമോക്രാറ്റിക് സെനറ്റർ എൽസ സ്കോട്ട്‌കിനെ പ്രത്യേകമായി പരാമർശിച്ച ട്രംപ്, റിപ്പബ്ലിക്കൻ മൂല്യങ്ങൾ പിൻപറ്റുന്ന രാജ്യത്തെ യുവതലമുറയെ അവർ വേട്ടയാടാൻ ശ്രമിക്കുകയാണെന്നും ആരോപിച്ചു. നിരപരാധികളായ നിരവധി പേർക്ക് ഡെമോക്രാറ്റിക് നേതാക്കൾ ഭീഷണി കത്തുകൾ അയച്ചിട്ടുണ്ടെന്നും, ഈ ക്രിമിനൽ കുറ്റകൃത്യത്തെക്കുറിച്ച് ഉടനടി അന്വേഷിക്കാൻ ഫെഡറൽ നിയമപാലകരോട് ഉത്തരവിടുകയാണെന്നും അദ്ദേഹം അറിയിച്ചു. ഇടക്കാല തെരഞ്ഞെടുപ്പിൽ ഡെമോക്രാറ്റുകൾ കോൺഗ്രസിന്റെ രണ്ട് സഭകളുടെയും നിയന്ത്രണം പിടിച്ചെടുത്ത പശ്ചാത്തലത്തിൽ യു.എസിലെ രാഷ്ട്രീയ പോർമുഖം കൂടുതൽ കലുഷിതമായിരിക്കുകയാണ്.
