റാഞ്ചി: ക്രിസ്തുമതം സ്വീകരിച്ചതിന്റെ പേരിൽ ജാർഖണ്ഡിലെ ഒരു ഗ്രാമത്തിൽ നാല് ആദിവാസി കുടുംബങ്ങളെ ഗ്രാമസഭ ഊരുവിലക്കി. പൊതുവഴികൾ ഉപയോഗിക്കുന്നതിനും പൊതു സ്രോതസ്സുകളിൽ നിന്ന് വെള്ളം ശേഖരിക്കുന്നതിനും ഇവർക്ക് കർശന നിരോധനം ഏർപ്പെടുത്തിയിരിക്കുകയാണ്. ഗ്രാമത്തിലെ മറ്റ് താമസക്കാർ ഈ കുടുംബങ്ങളുമായി സഹകരിക്കരുതെന്നും ലംഘിക്കുന്നവർക്ക് കനത്ത പിഴ ഈടാക്കുമെന്നും പ്രാദേശിക ഗ്രാമസഭ ഉത്തരവിട്ടു. സ്വന്തം കൃഷിയിടങ്ങളിൽ പ്രവേശിക്കുന്നതിനോ കന്നുകാലികളെ മേയ്ക്കുന്നതിനോ പോലും അനുവദിക്കാത്ത ക്രൂരമായ വിവേചനമാണ് ഈ കുടുംബങ്ങൾ ഇപ്പോൾ നേരിടുന്നത്.
പരമ്പരാഗത ഗോത്ര ആചാരങ്ങൾ വെടിഞ്ഞ് മതം മാറിയത് ഗ്രാമത്തിന്റെ ഐക്യത്തെ ബാധിക്കുമെന്നാരോപിച്ചാണ് ഗ്രാമത്തലവന്മാരുടെ ഈ നടപടി. മുൻപ് പലതവണ ഇവരെ പിന്തിരിപ്പിക്കാൻ ശ്രമിച്ചെങ്കിലും വിശ്വാസത്തിൽ ഉറച്ചുനിന്നതാണ് ഊരുവിലക്കിലേക്ക് നയിച്ചത്. അടിസ്ഥാന സൗകര്യങ്ങൾ നിഷേധിക്കപ്പെട്ടതോടെ ഈ കുടുംബങ്ങൾ കടുത്ത പട്ടിണിയിലും പ്രതിസന്ധിയിലുമാണ്. മനുഷ്യാവകാശ പ്രവർത്തകർ ഇടപെട്ട് പോലീസിൽ പരാതി നൽകിയിട്ടുണ്ടെങ്കിലും ഗ്രാമത്തിലെ സാമൂഹിക സമ്മർദ്ദം മൂലം അന്വേഷണം മന്ദഗതിയിലാണ്. മതസ്വാതന്ത്ര്യം ഉറപ്പുനൽകുന്ന ഭരണഘടനാ അവകാശങ്ങളുടെ നഗ്നമായ ലംഘനമാണ് ഇവിടെ നടക്കുന്നതെന്ന് ചൂണ്ടിക്കാട്ടി വ്യാപകമായ പ്രതിഷേധം ഉയരുന്നുണ്ട്.
