ടെഹ്റാൻ: ഇറാനിലെ ഭരണനേതൃത്വത്തെയും സൈനിക കേന്ദ്രങ്ങളെയും ലക്ഷ്യമിട്ട് അമേരിക്കയും ഇസ്രായേലും ശനിയാഴ്ച ആരംഭിച്ച സംയുക്ത സൈനിക നീക്കം (‘ഓപ്പറേഷൻ റോറിംഗ് ലയൺ’) അതീവ ഗുരുതരമായ ഘട്ടത്തിലേക്ക്. ഇറാന്റെ പരമോന്നത നേതാവ് ആയത്തുള്ള അലി ഖൊമേനി കൊല്ലപ്പെട്ടതായി സ്ഥിരീകരിക്കപ്പെട്ടതോടെ മേഖലയിൽ യുദ്ധം പടരുകയാണ്. കഴിഞ്ഞ മൂന്ന് ദിവസത്തിനുള്ളിൽ ഇറാനിലെ 1,250-ലധികം ലക്ഷ്യസ്ഥാനങ്ങളിൽ മിസൈൽ ആക്രമണം നടത്തിയതായും ‘വൻതോതിലുള്ള സൈനിക നടപടികൾ’ തുടരുമെന്നും അമേരിക്കൻ പ്രസിഡന്റ് ഡൊണാൾഡ് ട്രംപ് വ്യക്തമാക്കി. ഇറാന്റെ ആണവ കേന്ദ്രങ്ങൾ, മിസൈൽ വിക്ഷേപണ തറകൾ, തന്ത്രപ്രധാന സൈനിക ആസ്ഥാനങ്ങൾ എന്നിവയാണ് പ്രധാനമായും തകർക്കപ്പെട്ടത്. ടെഹ്റാനിലെ ജനവാസ മേഖലകളിലും ആക്രമണമുണ്ടായതായും നൂറുകണക്കിന് സാധാരണക്കാർ കൊല്ലപ്പെട്ടതായും റിപ്പോർട്ടുകളുണ്ട്.
ഇസ്രായേലിനും മേഖലയിലെ അമേരിക്കൻ സൈനിക താവളങ്ങൾക്കും നേരെ ബാലിസ്റ്റിക് മിസൈലുകളും ഡ്രോണുകളും ഉപയോഗിച്ച് ഇറാൻ ശക്തമായ തിരിച്ചടി നൽകുന്നുണ്ട്. ബഹ്റൈൻ, കുവൈത്ത്, ഖത്തർ, യുഎഇ, ജോർദാൻ എന്നീ രാജ്യങ്ങളിലെ സൈനിക കേന്ദ്രങ്ങളും വിമാനത്താവളങ്ങളും ലക്ഷ്യമിട്ടാണ് ഇറാന്റെ പ്രത്യാക്രമണം. ഖത്തറിലെ അൽ-ഉദൈദ് വ്യോമതാവളം ലക്ഷ്യമിട്ടെത്തിയ മിസൈലുകൾ ഖത്തർ പ്രതിരോധ സേന വെടിവെച്ചിട്ടു. സംഘർഷം ലെബനനിലേക്കും വ്യാപിച്ചിരിക്കുകയാണ്; ഹിസ്ബുല്ലയെ ലക്ഷ്യം വെച്ച് ഇസ്രായേൽ ബെയ്റൂത്തിലും തെക്കൻ ലെബനനിലും ബോംബാക്രമണം നടത്തി. ഹോർമുസ് കടലിടുക്കിലെ എണ്ണക്കപ്പലുകൾക്ക് നേരെ ആക്രമണമുണ്ടായതോടെ ആഗോള എണ്ണവില കുതിച്ചുയരുകയും വിമാന സർവീസുകൾ വ്യാപകമായി തടസ്സപ്പെടുകയും ചെയ്തിട്ടുണ്ട്. സ്ഥിതിഗതികൾ വഷളായതോടെ ഗൾഫിലുള്ള തങ്ങളുടെ പൗരന്മാരോട് ഉടൻ രാജ്യം വിടാൻ അമേരിക്ക നിർദ്ദേശിച്ചു.
