ജിദ്ദ: സൗദി അറേബ്യയിലെ ജിദ്ദയിൽ മൂന്ന് പതിറ്റാണ്ടിലേറെയായി പ്രവാസ ജീവിതം നയിച്ചിരുന്ന മണ്ണാർക്കാട് സ്വദേശി ഹൃദയാഘാതം മൂലം അന്തരിച്ചു. പാലക്കാട് മണ്ണാർക്കാട് കൂമരംപുത്തൂർ പള്ളിക്കുന്ന് സ്വദേശി വിയ്യനാടൻ ഹംസ (56) ആണ് നിര്യാതനായത്. ജിദ്ദയിലെ ശറഫിയയിൽ ടാക്സി ഡ്രൈവറായി ജോലി ചെയ്തുവരികയായിരുന്നു ഇദ്ദേഹം. കഴിഞ്ഞ 35 വർഷമായി പ്രവാസിയായ ഹംസ ജിദ്ദയിലെ മലയാളി സമൂഹത്തിനിടയിൽ സുപരിചിതനാണ്. ഹൃദയാഘാതത്തെ തുടർന്ന് അന്ത്യം സംഭവിച്ച അദ്ദേഹത്തിന്റെ മൃതദേഹം നിലവിൽ ജിദ്ദയിലെ അൽ തഗർ ഹോസ്പിറ്റൽ മോർച്ചറിയിൽ സൂക്ഷിച്ചിരിക്കുകയാണ്.
പരേതനായ വിയ്യനാടൻ മുഹമ്മദിന്റെയും കദീജയുടെയും മകനാണ് ഹംസ. ഷാജിയാണ് ഭാര്യ. മക്കൾ: മുഹമ്മദ് ഫായിസ്, ഫാസിൽ, ഷാജഹാൻ, ഷഹനാസ്. മരുമക്കൾ: ആയിഷ റിഷാന, റിംഷിദ്. അലവി, മുഹമ്മദലി, അബൂബക്കർ എന്നിവർ സഹോദരങ്ങളും ഫാത്തിമ, നബീസ, ആയിഷ, സൈനബ എന്നിവർ സഹോദരിമാരുമാണ്. ഔദ്യോഗിക നടപടിക്രമങ്ങൾ പൂർത്തിയാക്കിയ ശേഷം മൃതദേഹം ജിദ്ദയിൽ തന്നെ ഖബറടക്കുമെന്ന് ബന്ധുക്കൾ അറിയിച്ചു. നിയമനടപടികൾക്കും മറ്റു സഹായങ്ങൾക്കുമായി ജിദ്ദ കെ.എം.സി.സി വെൽഫെയർ വിങ് പ്രവർത്തകർ രംഗത്തുണ്ട്.
