ചെന്നൈ: തമിഴ്നാട് നിയമസഭയിലേക്കുള്ള 234 മണ്ഡലങ്ങളിലെയും വോട്ടെണ്ണൽ ആരംഭിച്ചപ്പോൾ ഭരണകക്ഷിയായ ഡി.എം.കെ (DMK) നേതൃത്വം നൽകുന്ന സഖ്യം വ്യക്തമായ മുന്നേറ്റം നടത്തുന്നതായി ആദ്യ സൂചനകൾ. വോട്ടെണ്ണൽ തുടങ്ങി ആദ്യ മണിക്കൂറുകളിൽ തന്നെ ഡി.എം.കെ 30-ലേറെ സീറ്റുകളിൽ ലീഡ് ചെയ്യുമ്പോഴ്, പ്രധാന പ്രതിപക്ഷമായ എ.ഐ.എ.ഡി.എം.കെ (AIADMK) 9 സീറ്റുകളിലും നടൻ വിജയ് നയിക്കുന്ന തമിഴക വെട്രി കഴകം (TVK) 6 സീറ്റുകളിലും മുന്നിലാണ്. മുഖ്യമന്ത്രി എം.കെ. സ്റ്റാലിൻ തന്റെ കോട്ടയായ കൊളത്തൂരിൽ ലീഡ് നിലനിർത്തുന്നുണ്ട്. കന്നി അങ്കത്തിനിറങ്ങിയ വിജയ് പെരമ്പൂർ മണ്ഡലത്തിൽ മുന്നേറുമ്പോൾ തിരുച്ചി ഈസ്റ്റിൽ പിന്നിലാണ്.
ഏപ്രിൽ 23-ന് നടന്ന വോട്ടെടുപ്പിൽ സംസ്ഥാന ചരിത്രത്തിലെ ഏറ്റവും ഉയർന്ന പോളിംഗ് ശതമാനങ്ങളിലൊന്നായ 85.1% ആണ് രേഖപ്പെടുത്തിയത്. ഡി.എം.കെ, എ.ഐ.എ.ഡി.എം.കെ, ടി.വി.കെ എന്നീ മുന്നണികൾ തമ്മിലുള്ള ശക്തമായ ത്രികോണ മത്സരമാണ് ഇക്കുറി തമിഴ്നാട്ടിൽ നടന്നത്. 62 കേന്ദ്രങ്ങളിലായി നടക്കുന്ന വോട്ടെണ്ണൽ പുരോഗമിക്കുന്നതനുസരിച്ച് ലീഡ് നിലകളിൽ ഇനിയും മാറ്റങ്ങൾ വരാം. മിക്ക എക്സിറ്റ് പോളുകളും ഡി.എം.കെയ്ക്ക് തുടർച്ചയായ രണ്ടാം ഭരണം പ്രവചിക്കുമ്പോഴും, ടി.വി.കെ പോലുള്ള പുതിയ പാർട്ടികളുടെ സ്വാധീനം വോട്ടുവിഹിതത്തിൽ നിർണ്ണായക മാറ്റങ്ങൾ വരുത്തുമെന്നാണ് രാഷ്ട്രീയ നിരീക്ഷകർ കരുതുന്നത്. വോട്ടെണ്ണൽ കേന്ദ്രങ്ങളിൽ കനത്ത സുരക്ഷയാണ് ഏർപ്പെടുത്തിയിരിക്കുന്നത്. ഉച്ചയോടെ സംസ്ഥാനത്തെ രാഷ്ട്രീയ ചിത്രം കൂടുതൽ വ്യക്തമാകുമെന്ന് കരുതുന്നു
