അബുദാബി: അമേരിക്കയും ഇറാനും തമ്മിലുള്ള സൈനിക നീക്കങ്ങൾ വീണ്ടും ശക്തമായതോടെ, യുഎഇക്ക് നേരെയുണ്ടായ പുതിയ മിസൈൽ-ഡ്രോൺ ആക്രമണങ്ങളെ വിജയകരമായി തടഞ്ഞതായി പ്രതിരോധ മന്ത്രാലയം അറിയിച്ചു. വെള്ളിയാഴ്ച (മേയ് 8, 2026) പുലർച്ചെയാണ് യുഎഇയുടെ വ്യോമപ്രതിരോധ സംവിധാനങ്ങൾ ശത്രുതാപരമായ മിസൈലുകളെ ആകാശത്തുവെച്ച് തന്നെ നശിപ്പിച്ചത്. ഇറാനുമായുള്ള യുദ്ധത്തിൽ നിലനിൽക്കുന്ന വെടിനിർത്തൽ കരാർ ലംഘിക്കപ്പെടുന്ന സാഹചര്യത്തിലാണ് ഈ പുതിയ പ്രകോപനം ഉണ്ടായിരിക്കുന്നത്. തകർത്ത മിസൈലുകളുടെയോ ഡ്രോണുകളുടെയോ അവശിഷ്ടങ്ങൾ കണ്ടെത്തുകയാണെങ്കിൽ അവയിൽ തൊടരുതെന്നും ഉടനടി അധികൃതരെ വിവരം അറിയിക്കണമെന്നും മന്ത്രാലയം ജനങ്ങൾക്ക് നിർദ്ദേശം നൽകി.
ഹോർമുസ് കടലിടുക്കിൽ മൂന്ന് അമേരിക്കൻ പടക്കപ്പലുകൾക്ക് നേരെ ഇറാൻ നടത്തിയ ആക്രമണത്തിന് പിന്നാലെയാണ് യുഎഇ മേഖലയിലും സംഘർഷം ഉടലെടുത്തത്. വ്യാഴാഴ്ച രാത്രി അമേരിക്കൻ കപ്പലുകൾക്ക് നേരെയുണ്ടായ പ്രകോപനത്തിന് മറുപടിയായി, ആക്രമണത്തിന് ഉത്തരവാദികളായ ഇറാന്റെ സൈനിക കേന്ദ്രങ്ങൾ ലക്ഷ്യമിട്ട് അമേരിക്ക തിരിച്ചടി നടത്തിയിരുന്നു. ഇത്തരത്തിൽ ഇരുരാജ്യങ്ങളും പരസ്പരം പ്രത്യാക്രമണങ്ങൾ നടത്തുന്നതിനിടയിലാണ് യുഎഇയുടെ അതിർത്തിക്കുള്ളിലേക്ക് ആക്രമണമുണ്ടാകുന്നത്. എന്നിരുന്നാലും, ഈ പ്രകോപനങ്ങൾക്കിടയിലും സമാധാന ചർച്ചകൾ തുടരുകയാണെന്നും വെടിനിർത്തൽ നിലനിൽക്കുന്നുണ്ടെന്നുമാണ് അമേരിക്കൻ പ്രസിഡന്റ് ഡൊണാൾഡ് ട്രംപ് പ്രതികരിച്ചത്.
ഏപ്രിൽ 8-ന് നിലവിൽ വന്ന വെടിനിർത്തൽ കരാർ ഇതോടെ വലിയ പ്രതിസന്ധിയിലായിരിക്കുകയാണ്. ഹോർമുസ് കടലിടുക്ക് തുറക്കാനുള്ള ‘പ്രോജക്റ്റ് ഫ്രീഡം’ എന്ന അമേരിക്കൻ നീക്കത്തിന് മറുപടിയായാണ് ഇറാൻ തങ്ങളുടെ സൈനിക നടപടികൾ ആസൂത്രണം ചെയ്യുന്നത്. മേഖലയിലെ എണ്ണ വിതരണ ശൃംഖലയെയും സുരക്ഷയെയും ബാധിക്കുന്ന ഇത്തരം ആക്രമണങ്ങൾ ആഗോള തലത്തിൽ വലിയ ആശങ്ക പടർത്തുന്നുണ്ട്. നിലവിൽ യുഎഇയിലെ സ്ഥിതിഗതികൾ നിയന്ത്രണവിധേയമാണെന്നും രാജ്യത്തിന്റെ സുരക്ഷ ഉറപ്പാക്കാൻ സൈന്യം അതീവ ജാഗ്രതയിലാണെന്നും അധികൃതർ വ്യക്തമാക്കി.
