ചെന്നൈ: തമിഴ്നാട് നിയമസഭാ തിരഞ്ഞെടുപ്പ് ഫലത്തിന് പിന്നാലെ സഖ്യകക്ഷിയായിരുന്ന കോൺഗ്രസിനെതിരെ രൂക്ഷവിമർശനവുമായി ഡി.എം.കെ അധ്യക്ഷൻ എം.കെ. സ്റ്റാലിൻ രംഗത്തെത്തി. ഒരൊറ്റ ദിവസം കൊണ്ട് ഡി.എം.കെയുമായുള്ള ദീർഘകാല ബന്ധം ഉപേക്ഷിച്ച് വിജയ് നയിക്കുന്ന തമിഴക വെട്രി കഴകത്തിനൊപ്പം (ടി.വി.കെ) ചേരാനുള്ള കോൺഗ്രസിന്റെ തീരുമാനം രാഷ്ട്രീയ മര്യാദയ്ക്ക് നിരക്കാത്തതാണെന്ന് അദ്ദേഹം ഫേസ്ബുക്ക് പോസ്റ്റിലൂടെ ആരോപിച്ചു. ഡി.എം.കെ സഖ്യത്തിന്റെ ഭാഗമായി മത്സരിച്ചു ജയിച്ചുവന്ന കോൺഗ്രസ് നേതാക്കൾ പിരിഞ്ഞുപോകുമ്പോൾ ഒരു നന്ദി പറയാൻ പോലും തയ്യാറായില്ലെന്നത് ഏറെ ഖേദകരമാണെന്നും സ്റ്റാലിൻ കുറിച്ചു.
അതേസമയം, കടുത്ത പ്രതിസന്ധിഘട്ടത്തിലും ഡി.എം.കെയോടുള്ള ആദർശപരമായ സൗഹൃദം തുടരുമെന്ന് പ്രഖ്യാപിച്ച ഇടതുപക്ഷ നേതാക്കളായ പി. ഷൺമുഖം, എം. വീരപാണ്ഡ്യൻ, വി.സി.കെ നേതാവ് തിരുമാവളവൻ എന്നിവർക്ക് അദ്ദേഹം പ്രത്യേക നന്ദി രേഖപ്പെടുത്തി. തമിഴ്നാടിന്റെ അവകാശങ്ങൾക്കായി ഇവർ ഡി.എം.കെയോടൊപ്പം തുടർന്നും പോരാട്ടം തുടരുമെന്നും സ്റ്റാലിൻ വ്യക്തമാക്കി. സങ്കീർണ്ണമായ രാഷ്ട്രീയ സാഹചര്യം ഒഴിവാക്കാനാണ് ഇവർ ടി.വി.കെ സർക്കാരിന് പിന്തുണ നൽകുന്നതെങ്കിലും മതനിരപേക്ഷ പുരോഗമന സഖ്യത്തിൽ ഇവർ ഉറച്ചുനിൽക്കുമെന്ന തീരുമാനം ഡി.എം.കെയ്ക്ക് വലിയ ആത്മവിശ്വാസമാണ് നൽകുന്നത്.
വിജയ്യുടെ നേതൃത്വത്തിലുള്ള പുതിയ സർക്കാർ രൂപീകരണത്തിന് ഡി.എം.കെ യാതൊരു തടസ്സവും നിൽക്കില്ലെന്നും സമാധാനപരമായ ഭരണകൈമാറ്റം ഉറപ്പാക്കുമെന്നും സ്റ്റാലിൻ പ്രഖ്യാപിച്ചു. ‘വിശ്വാസം തോറ്റിട്ടില്ല’ എന്ന സന്ദേശത്തിലൂടെ തിരഞ്ഞെടുപ്പിലെ തിരിച്ചടികളെ ജനാധിപത്യപരമായി ഉൾക്കൊള്ളാൻ അദ്ദേഹം പ്രവർത്തകരോട് ആഹ്വാനം ചെയ്തു. ഡി.എം.കെ എന്ന പ്രസ്ഥാനത്തിന്റെ ആദർശത്തിലുള്ള വിശ്വാസമാണ് സഖ്യകക്ഷികൾ കാത്തുസൂക്ഷിക്കുന്നതെന്നും അദ്ദേഹം കൂട്ടിച്ചേർത്തു.
