ബംഗളൂരു: ദീർഘനാളത്തെ രാഷ്ട്രീയ അനിശ്ചിതത്വങ്ങൾക്കും കടുത്ത തർക്കങ്ങൾക്കും വിരാമമിട്ടുകൊണ്ട് കർണാടകയുടെ പുതിയ മുഖ്യമന്ത്രിയായി ഡി.കെ. ശിവകുമാർ ബുധനാഴ്ച സത്യപ്രതിജ്ഞ ചെയ്ത് അധികാരമേൽക്കും. പുതിയ സർക്കാറിന്റെ സത്യപ്രതിജ്ഞാ ചടങ്ങുകൾ നാളെ വൈകീട്ട് ബംഗളൂരുവിൽ വെച്ച് വിപുലമായ രീതിയിൽ നടക്കും. തെരഞ്ഞെടുപ്പ് വിജയത്തിന് ശേഷം മുഖ്യമന്ത്രി സ്ഥാനം ആർക്ക് നൽകണം എന്ന കാര്യത്തിൽ ഡി.കെ. ശിവകുമാറും സിദ്ധരാമയ്യയും തമ്മിൽ കടുത്ത തർക്കങ്ങൾ നിലനിന്നിരുന്നു. എന്നാൽ എല്ലാ പ്രതിസന്ധികളും പരിഹരിച്ചാണ് ഡി.കെ. മുഖ്യമന്ത്രി പദത്തിലെത്തുന്നത്. ആദ്യഘട്ടത്തിൽ മുഖ്യമന്ത്രി ഡി.കെ. ശിവകുമാറിനൊപ്പം 11 മന്ത്രിമാരും നാളെ ചുമതലയേൽക്കും. ഈ മാസം 18ന് നടക്കുന്ന രാജ്യസഭാ തെരഞ്ഞെടുപ്പിന് ശേഷമായിരിക്കും മന്ത്രിസഭയുടെ അടുത്ത വിപുലീകരണം ഉണ്ടാകുക.
ഭരണമാറ്റം സുഗമമാക്കുന്നതിന്റെ ഭാഗമായാണ് ആദ്യഘട്ട മന്ത്രിമാരെ നിശ്ചയിച്ചിരിക്കുന്നത്. ജി. പരമേശ്വര, സതീഷ് ജാർക്കിഹോളി, എം.ബി. പാട്ടീൽ, ഈശ്വർ ഖന്ദ്രേ, രാമലിംഗ റെഡ്ഡി, ശിവരാജ് തങ്കടഗി, രൂപാ ശശിധർ എന്നിവരാണ് മന്ത്രിസഭയിലെ മറ്റ് പ്രമുഖർ. ഇതിനിടെ, പുതിയ മന്ത്രിസഭയിൽ സ്ഥാനമൊഴിയുന്ന മുഖ്യമന്ത്രി സിദ്ധരാമയ്യയുടെ മകൻ യതീന്ദ്ര സിദ്ധരാമയ്യ, കോൺഗ്രസ് ദേശീയ അധ്യക്ഷൻ മല്ലികാർജുൻ ഖർഗെയുടെ മകൻ പ്രിയങ്ക് ഖർഗെ എന്നിവരെ പുതുമുഖങ്ങളായി ഉൾപ്പെടുത്തിയത് വലിയ രാഷ്ട്രീയ വിമർശനങ്ങൾക്ക് കാരണമായിട്ടുണ്ട്. കോൺഗ്രസ് ‘കുടുംബ രാഷ്ട്രീയം’ പ്രോത്സാഹിപ്പിക്കുന്നു എന്നാരോപിച്ച് പ്രതിപക്ഷ പാർട്ടികൾ ഇതിനെതിരെ ഇതിനകം രംഗത്തുവന്നിട്ടുണ്ട്. കൂടാതെ, ഭരണമാറ്റം സുഗമമാക്കുന്നതിനായി സിദ്ധരാമയ്യ പക്ഷത്തിന് അമിത പ്രാധാന്യം നൽകിയതും വലിയ ചർച്ചയാണ്. സിദ്ധരാമയ്യയുടെ പക്ഷത്ത് നിന്ന് ഒമ്പത് പേർക്ക് മന്ത്രിസ്ഥാനം ലഭിക്കുമെന്ന റിപ്പോർട്ടുകൾ ഡി.കെ. ശിവകുമാർ പക്ഷത്ത് നേരിയ അതൃപ്തിക്ക് ഇടയാക്കിയേക്കുമെന്ന സൂചനകളുമുണ്ട്.
വിവാദങ്ങൾക്കും രാഷ്ട്രീയ ചർച്ചകൾക്കുമിടയിലും കേരളത്തിന് വലിയ അഭിമാനമായി മാറിയിരിക്കുകയാണ് പുതിയ കർണാടക മന്ത്രിസഭാ രൂപീകരണം. പ്രമുഖ മലയാളി നേതാക്കളായ കെ.ജെ. ജോർജ്, യു.ടി. ഖാദർ എന്നിവർ പുതിയ മന്ത്രിസഭയിൽ ഇടംപിടിച്ചത് ശ്രദ്ധേയമായി. കർണാടക രാഷ്ട്രീയത്തിൽ മലയാളി സാന്നിധ്യം ഉറപ്പിക്കുന്നതാണ് ഈ തീരുമാനം.
