വാഷിംഗ്ടൺ/ടെഹ്റാൻ: ഹോർമുസ് കടലിടുക്കിനെ ചൊല്ലി പശ്ചിമേഷ്യയിൽ ഇരുരാജ്യങ്ങളും തമ്മിൽ നേരിട്ടുള്ള സൈനിക ഏറ്റുമുട്ടലുകൾ വൻതോതിൽ വർദ്ധിച്ച സാഹചര്യത്തിൽ, പരസ്പരമുള്ള ആക്രമണങ്ങൾ താൽക്കാലികമായി നിർത്തിവെക്കാൻ അമേരിക്കയും ഇറാനും ധാരണയിലെത്തിയതായി റിപ്പോർട്ട്. തന്ത്രപ്രധാനമായ ഈ കടൽപ്പാതയിലെ തർക്കങ്ങൾക്ക് ശാശ്വത പരിഹാരം കാണുന്നതിനായി ഇരുരാജ്യങ്ങളുടെയും ഉന്നത പ്രതിനിധികൾ ചൊവ്വാഴ്ച ഖത്തറിന്റെ തലസ്ഥാനമായ ദോഹയിൽ വെച്ച് അടിയന്തര ചർച്ച നടത്തുമെന്ന് മുതിർന്ന യു.എസ് ഉദ്യോഗസ്ഥരെ ഉദ്ധരിച്ച് അന്താരാഷ്ട്ര മാധ്യമമായ ‘അക്സിയോസ്’ റിപ്പോർട്ട് ചെയ്തു. മിസൈൽ-ഡ്രോൺ ആക്രമണങ്ങൾ ഉൾപ്പെടെയുള്ള എല്ലാവിധ നേരിട്ടുള്ള സൈനിക നടപടികളും തൽക്കാലം നിർത്തിവെക്കാൻ ഇരുവിഭാഗവും തീരുമാനിച്ചതായും, ചർച്ചകൾ തുടരുന്ന സാഹചര്യത്തിൽ കപ്പലുകൾക്ക് മേഖലയിലൂടെ സ്വതന്ത്രമായി സഞ്ചരിക്കാമെന്നും യു.എസ് വൃത്തങ്ങൾ വ്യക്തമാക്കി.
മേഖലയിലെ യുദ്ധം അവസാനിപ്പിക്കുന്നതിനായി നേരത്തെ ഒപ്പുവെച്ച താൽക്കാലിക ധാരണാപത്രത്തിലെ വ്യവസ്ഥകളെ ഇരുരാജ്യങ്ങളും വ്യത്യസ്ത രീതികളിൽ വ്യാഖ്യാനിച്ചതാണ് കഴിഞ്ഞ ദിവസങ്ങളിൽ കടുത്ത സൈനിക ഏറ്റുമുട്ടലുകളിലേക്ക് നയിച്ചത്. ഹോർമുസ് കടലിടുക്കിലൂടെയുള്ള വാണിജ്യ കപ്പലുകളുടെ സുരക്ഷിതമായ ഗതാഗതം ഉറപ്പാക്കാൻ ഇറാൻ പരമാവധി ശ്രമിക്കുമെന്നും, പകരം ഇറാന്റെ തുറമുഖങ്ങൾക്ക് മേൽ ഏർപ്പെടുത്തിയിരുന്ന ഉപരോധം അമേരിക്ക നീക്കുമെന്നുമായിരുന്നു ധാരണാപത്രത്തിലെ പ്രധാന വ്യവസ്ഥ. കൂടാതെ, കപ്പൽ ഗതാഗതം ഏകോപിപ്പിക്കുന്നതിനായി യു.എസ് സൈന്യവും ഇറാന്റെ ഇസ്ലാമിക് റവല്യൂഷണറി ഗാർഡും തമ്മിൽ നേരിട്ടൊരു ഹോട്ട്ലൈൻ സംവിധാനം സ്ഥാപിക്കാൻ കഴിഞ്ഞ ആഴ്ച സ്വിറ്റ്സർലൻഡിൽ വെച്ച് നടന്ന ചർച്ചയിൽ യു.എസ് വൈസ് പ്രസിഡന്റ് ജെ.ഡി വാൻസും ഇറാനിയൻ പ്രതിനിധി സംഘവും സമ്മതിച്ചിരുന്നു. എന്നാൽ ശനിയാഴ്ചയായിട്ടും ഈ ഹോട്ട്ലൈൻ സംവിധാനം പ്രവർത്തനക്ഷമമായിരുന്നില്ല. ഇതോടൊപ്പം തന്നെ തങ്ങളുടെ അനുമതിയോടെ മാത്രമേ വാണിജ്യ കപ്പലുകൾ കടത്തിവിടൂ എന്ന് ഇറാൻ വീണ്ടും നിർബന്ധം പിടിച്ചതാണ് സംഘർഷം വീണ്ടും വഷളാക്കിയത്.
ഇറാന്റെ ആണവ പദ്ധതിയെക്കുറിച്ച് ചർച്ച ചെയ്യുന്നതിനായി സ്വിറ്റ്സർലൻഡിൽ നടത്താനിരുന്ന ഉന്നതതല യോഗമാണ് നിലവിലെ അടിയന്തര സാഹചര്യം കണക്കിലെടുത്ത് ഖത്തറിലേക്ക് മാറ്റിയത്. വരാനിരിക്കുന്ന ദോഹ ചർച്ചകളിൽ ഹോർമുസ് കടലിടുക്കിലെ കപ്പൽ ഗതാഗത സ്വാതന്ത്ര്യത്തിനും സമുദ്ര സുരക്ഷയ്ക്കുമായിരിക്കും പ്രധാന മുൻഗണന നൽകുക. പുതിയ ആക്രമണ പ്രത്യാക്രമണങ്ങളുടെ പശ്ചാത്തലത്തിൽ വാഷിംഗ്ടണും ടെഹ്റാനും തമ്മിലുള്ള ചർച്ചകൾ പൂർണ്ണമായും വഴിമുട്ടിയതായി ഞായറാഴ്ച രാവിലെ ‘ദി വാൾ സ്ട്രീറ്റ് ജേണൽ’ റിപ്പോർട്ട് ചെയ്തിരുന്നുവെങ്കിലും അതിന് ശേഷമാണ് പുതിയ സമനില സാധ്യതകൾ തെളിഞ്ഞത്. എന്നാൽ, നിലവിൽ ധാരണയിലെത്തിയതായി റിപ്പോർട്ടുകൾ പുറത്തുവരുന്നുണ്ടെങ്കിലും വൈറ്റ് ഹൗസോ ഇറാന്റെ ഔദ്യോഗിക വൃത്തങ്ങളോ ഇതേക്കുറിച്ച് പരസ്യമായ പ്രതികരണങ്ങൾക്ക് ഇതുവരെ തയ്യാറായിട്ടില്ല.
