കൊച്ചി: എ.ഡി.ജി.പിയായിരുന്ന എസ്. ശ്രീജിത്തിനെ ഡി.ജി.പിയായി ഉയർത്തിയ സംസ്ഥാന സർക്കാർ തീരുമാനത്തിനെതിരെ കടുത്ത അതൃപ്തിയും വിമർശനവുമായി ഹൈക്കോടതി. അഴിമതി ആരോപണങ്ങളും അന്വേഷണങ്ങളും നേരിടുന്ന ഒരു ഉദ്യോഗസ്ഥന് സ്ഥാനക്കയറ്റം നൽകാൻ സർക്കാർ എന്തുകൊണ്ടാണ് ഇത്ര തിടുക്കം കാണിച്ചതെന്നും, നിലവിലെ ഈ നടപടി പൂർണ്ണമായും ചട്ടവിരുദ്ധമാണെന്നും കോടതി നിരീക്ഷിച്ചു. വിഷയം കോടതിയുടെ പരിഗണനയിലിരിക്കെ തന്നെ ആരോപണവിധേയനായ വ്യക്തിക്ക് ഡി.ജി.പി പദവി നൽകാൻ കാണിച്ച താല്പര്യം ചോദ്യം ചെയ്ത കോടതി, സ്ഥാനക്കയറ്റം നൽകുന്ന സമയത്ത് ആവശ്യമായ വിജിലൻസ് ക്ലിയറൻസ് ലഭ്യമാക്കിയിരുന്നോ എന്ന് വ്യക്തമാക്കാൻ സംസ്ഥാന സർക്കാരിനോട് നിർദ്ദേശിക്കുകയും വിഷയം സംബന്ധിച്ച് കൃത്യമായ മറുപടി നൽകാൻ ആവശ്യപ്പെടുകയും ചെയ്തു.
പൊലീസ് ഹെഡ്ക്വാർട്ടേഴ്സ് എ.ഡി.ജി.പിയായി സേവനമനുഷ്ഠിക്കവെ ബോഡി ബിൽഡർമാർക്ക് ഇൻസ്പെക്ടർമാരായി നിയമനം നൽകുന്നതിനായി എസ്. ശ്രീജിത്ത് വഴിവിട്ട ഇടപെടലുകൾ നടത്തുകയും അഴിമതി കാണിക്കുകയും ചെയ്തുവെന്ന് ആരോപിച്ച് പൊതുപ്രവർത്തകൻ കെ.എം. ഷാജഹാൻ സമർപ്പിച്ച ഹരജി പരിഗണിക്കവെയാണ് ഹൈക്കോടതിയുടെ ഈ നിർണ്ണായക പരാമർശങ്ങൾ. പരാതിയിൽ വിജിലൻസ് അന്വേഷണം പ്രഖ്യാപിക്കുന്ന കാര്യത്തിൽ തീരുമാനമെടുക്കാൻ സർക്കാരിന് കോടതി അനുവദിച്ച രണ്ടാഴ്ചത്തെ കാലാവധി അവസാനിക്കാനിരിക്കെയാണ് ഈ വിമർശനം ഉയർന്നത്.
ശ്രീജിത്തിനെതിരെ വിജിലൻസ് ഡയറക്ടർ അന്വേഷണാനുമതി തേടിയെങ്കിലും ആഭ്യന്തര-വിജിലൻസ് വകുപ്പ് അഡീഷണൽ ചീഫ് സെക്രട്ടറി അത് നിരസിച്ചതായി കെ.എം. ഷാജഹാന്റെ ഹരജിയിൽ ചൂണ്ടിക്കാണിക്കുന്നു. മുൻ ആഭ്യന്തര സെക്രട്ടറിയും നിലവിലെ ചീഫ് സെക്രട്ടറിയുമായ ബിശ്വനാഥ് സിൻഹ, ആഭ്യന്തര സെക്രട്ടറി മിൻഹാജ് ആലം എന്നിവർ ശ്രീജിത്തിനെ വഴിവിട്ട് സഹായിക്കുകയാണെന്നും ഹരജിക്കാരൻ ആരോപിച്ചിട്ടുണ്ട്. എന്നാൽ, ജൂലൈ 31-ന് എസ്. ശ്രീജിത്തിന് നൽകിയ സ്ഥാനക്കയറ്റം കേവലം ഒരു സ്വാഭാവിക സർവീസ് നടപടി മാത്രമാണെന്നാണ് സർക്കാർ ഹൈക്കോടതിയിൽ നൽകിയ വിശദീകരണം
