മുംബൈ: ഗാന്ധി രാജ്യത്തിന്റെ ആത്മാവാണെന്നും ഗാന്ധിയൻ പ്രത്യയശാസ്ത്രത്തിന്റെ അടിത്തറയിലാണ് രാജ്യം സുസ്ഥിരമായി നിലനിൽക്കുന്നതെന്നും സി.ജെ.പി (CJP) നേതാവ് അഭിജീത് ദീപ്‌കെ. അംബേദ്കർ ഇന്ത്യയുടെ നട്ടെല്ലാണെന്നും അദ്ദേഹം കൂട്ടിച്ചേർത്തു. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ അടിയന്തര രാജിയാവശ്യപ്പെട്ടും വിവാദമായ എസ്.ഐ.ആർ (SIR) നടപടികൾ നിർത്തിവെക്കണമെന്ന് ആവശ്യപ്പെട്ടും കോക്രോച്ച് ജനതാ പാർട്ടി (സി.ജെ.പി) മുംബൈയിൽ സംഘടിപ്പിച്ച ‘ജയിൽ നിറയ്ക്കൽ’ സമരത്തിൽ സംസാരിക്കുകയായിരുന്നു അദ്ദേഹം. സമരത്തിന്റെ പ്രധാന കേന്ദ്രമായ ശിവാജി പാർക്കിൽ ഒത്തുകൂടുന്നതിന് പോലീസ് മുൻകൂട്ടി അനുമതി നിഷേധിച്ചിരുന്നെങ്കിലും, വിലക്കുകൾ ലംഘിച്ച് രാജ്യത്തിന്റെ വിവിധ ഭാഗങ്ങളിൽ നിന്നുള്ള നൂറുകണക്കിന് സി.ജെ.പി പ്രവർത്തകരാണ് മുംബൈയിലേക്ക് ഒഴുകിയെത്തുന്നത്.
വിദ്യാർത്ഥികൾ, അധ്യാപകർ, സിനിമാ താരങ്ങൾ, പ്രമുഖ സെലിബ്രിറ്റികൾ, പ്രതിപക്ഷ പാർട്ടി പ്രതിനിധികൾ എന്നിവരുൾപ്പെടെ വൻ ജനപങ്കാളിത്തമാണ് പ്രതിഷേധത്തിൽ റിപ്പോർട്ട് ചെയ്യുന്നത്. പ്രതിഷേധം കടുക്കുന്ന സാഹചര്യത്തിൽ ദാദർ റെയിൽവേ സ്റ്റേഷൻ, ശിവാജി പാർക്ക് പരിസരം എന്നിവിടങ്ങളിൽ കനത്ത പോലീസ് സുരക്ഷ ഏർപ്പെടുത്തിയിട്ടുണ്ട്. ക്രമസമാധാന പാലനത്തിനായി സ്ഥലത്ത് സി.ആർ.പി.എഫിനെയും (CRPF) വിന്യസിച്ചിട്ടുണ്ട്. പ്രക്ഷോഭം വരും ദിവസങ്ങളിൽ മറ്റ് സംസ്ഥാനങ്ങളിലേക്കും ശക്തമായി വ്യാപിപ്പിക്കാനാണ് സംഘടനയുടെ തീരുമാനം.
