വാഷിംഗ്‌ടൺ: യു.എസ് പ്രതിരോധ സെക്രട്ടറി പീറ്റ് ഹെഗ്‌സെത് രാജിവെക്കണമെന്ന് പരസ്യമായി ആവശ്യപ്പെട്ട് റിപ്പബ്ലിക്കൻ കോൺഗ്രസ് അംഗം തോമസ് മാസി. ഇംപീച്ച്‌മെന്റ് പ്രമേയം സഭയിൽ വീണ്ടും അവതരിപ്പിക്കുന്നതിന് മുൻപ് ഹെഗ്‌സെതിന് രാജിവെക്കാൻ അവസരമുണ്ടെന്നും, രാജി സമർപ്പിച്ചാൽ മാത്രമേ ഇംപീച്ച്‌മെന്റ് നീക്കത്തിൽ നിന്ന് പിന്മാറുകയുള്ളൂവെന്നും അദ്ദേഹം വ്യക്തമാക്കി. സമൂഹമാധ്യമമായ ‘എക്‌സിൽ’ (X) പങ്കുവെച്ച കുറിപ്പിലൂടെയാണ് തോമസ് മാസി തന്റെ നിലപാട് വ്യക്തമാക്കിയത്.
എന്നാൽ, പ്രസിഡന്റ് ഡൊണാൾഡ് ട്രംപിന്റെ കാലാവധി പൂർത്തിയാകുന്നതുവരെ പ്രതിരോധ വകുപ്പിനെ നയിക്കാൻ സെക്രട്ടറി പീറ്റ് ഹെഗ്‌സെത് നൂറു ശതമാനം പ്രതിജ്ഞാബദ്ധനാണെന്ന് പെന്റഗൺ വക്താവ് ഷോൺ പാർനെൽ പ്രതികരിച്ചു. രാഷ്ട്രീയ നേട്ടങ്ങൾക്കോ അല്ലെങ്കിൽ യാതൊരു തെറ്റും സംഭവിച്ചിട്ടില്ലാത്ത വിഷയങ്ങളിൽ വ്യാജ അന്വേഷണങ്ങൾ നടത്താനോ ശ്രമിക്കുന്ന രാഷ്ട്രീയക്കാരുടെ ഭീഷണികൾക്ക് മുന്നിൽ പീറ്റ് ഹെഗ്‌സെത് പിന്മാറുകയോ ഭയപ്പെടുകയോ ചെയ്യില്ലെന്ന് അദ്ദേഹം കൂട്ടിച്ചേർത്തു. യു.എസ് പ്രതിരോധ വകുപ്പ് പൂർണ്ണമായും നിയമമനുസരിച്ചാണ് പ്രവർത്തിച്ചതെന്നും, ഡെമോക്രാറ്റുകൾ നടത്തുന്ന അന്വേഷണ നാടകങ്ങളെ അവഗണിച്ച് ട്രംപ് ഭരണകൂടത്തിന്റെ ലക്ഷ്യങ്ങളുമായി മുന്നോട്ട് പോകുമെന്നും പെന്റഗൺ വക്താവ് വ്യക്തമാക്കി. പ്രതിരോധ സെക്രട്ടറിയെ ഇംപീച്ച് ചെയ്യുന്നതിനുള്ള വോട്ടെടുപ്പ് അടുത്ത ആഴ്ചയോടെ ഹൗസ് ഓഫ് റെപ്രസെന്റേറ്റീവ്സിൽ നടന്നേക്കുമെന്ന് മാധ്യമങ്ങൾ റിപ്പോർട്ട് ചെയ്തു.
