വാഷിംഗ്ടൺ: യു.എസ് ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടി നേരിട്ട കനത്ത തോൽവിക്ക് കാരണം ഇറാനുമായുള്ള യുദ്ധവും ഇസ്രായേൽ അനുകൂല നയങ്ങളുമാണെന്ന് വൈസ് പ്രസിഡന്റ് ജെ.ഡി. വാൻസ്. പോളിങ് കുറഞ്ഞതല്ല, മറിച്ച് ട്രംപ് ഭരണകൂടത്തിന്റെ യുദ്ധ നയങ്ങളിലുള്ള ജനങ്ങളുടെ അതൃപ്തിയാണ് റിപ്പബ്ലിക്കൻ വോട്ടർമാരെ പാർട്ടിയിൽനിന്ന് അകറ്റിയതെന്നും അദ്ദേഹം വ്യക്തമാക്കി. സമൂഹമാധ്യമമായ ‘എക്സി’ൽ പങ്കുവെച്ച കുറിപ്പിലാണ് വാൻസ് പാർട്ടി പരാജയത്തിന്റെ യഥാർത്ഥ കാരണങ്ങൾ തുറന്നുപറഞ്ഞത്.
ഇറാനുമായുള്ള സംഘർഷം, വർധിച്ചുവരുന്ന ജീവിതച്ചെലവും വിലക്കയറ്റവും, ‘അമേരിക്ക ആദ്യം’ എന്ന നയത്തിൽ നിന്നുള്ള വ്യതിചലനം, ഇസ്രായേലുമായുള്ള അമിതബന്ധം എന്നിവയാണ് റിപ്പബ്ലിക്കൻ പാർട്ടിക്ക് തിരിച്ചടിയായ പ്രധാന നാല് ഘടകങ്ങളെന്ന് വാൻസ് ചൂണ്ടിക്കാട്ടി. 2024-ൽ ട്രംപിന് വോട്ട് ചെയ്ത പല വോട്ടർമാരും ഈ നയങ്ങളിൽ അസംതൃപ്തരാണെന്ന് നേരത്തെ തന്നെ സർവേകളിൽ വ്യക്തമായിരുന്നുവെന്നും അദ്ദേഹം കൂട്ടിച്ചേർത്തു. പാർട്ടി തോറ്റത് എങ്ങനെയെന്ന് എല്ലാവർക്കും അറിയാമെന്നും, ഭാവിയിൽ തിരുത്തലുകൾ വരുത്താൻ സുതാര്യമായ ചർച്ചകളാണ് വേണ്ടതെന്നും വാൻസ് ഓർമിപ്പിച്ചു.
