മസ്കറ്റ്: പശ്ചിമേഷ്യയിലെ സംഘർഷാവസ്ഥ കൂടുതൽ രൂക്ഷമാകുന്നത് തടയാനും ചർച്ചകൾക്കും നയതന്ത്ര നീക്കങ്ങൾക്കും വീണ്ടും ജീവൻ നൽകാനും ലക്ഷ്യമിട്ട് ഇറാനും ഒമാനും തമ്മിൽ നിർണ്ണായക ചർച്ച നടന്നു. ഇരുരാജ്യങ്ങളുടെയും വിദേശകാര്യ മന്ത്രിമാരാണ് ആശയവിനിമയം നടത്തിയത്. ബന്ധപ്പെട്ട കക്ഷികൾക്കിടയിൽ പരസ്പര ധാരണയ്ക്കുള്ള മേഖലകൾ വിപുലീകരിക്കാനും പ്രതിസന്ധി വ്യാപിക്കുന്നതും അതിന്റെ പ്രത്യാഘാതങ്ങളും തടയാനുമാണ് ഈ ശ്രമങ്ങളിലൂടെ ലക്ഷ്യമിടുന്നതെന്ന് ഒമാൻ വിദേശകാര്യ മന്ത്രാലയം പുറത്തിറക്കിയ പ്രസ്താവനയിൽ വ്യക്തമാക്കി.
അമേരിക്കയുടെ മൂന്നാമത്തെ വിമാനവാഹിനിക്കപ്പൽ വ്യൂഹം പശ്ചിമേഷ്യയിൽ വിന്യസിക്കപ്പെട്ടതിനും ബഹ്റൈന് നേരെ ഇറാന്റെ പുതിയ ആക്രമണം ഉണ്ടായതിനും തൊട്ടുപിന്നാലെയാണ് ഈ നയതന്ത്ര നീക്കം. ഇതിനിടെ, ഇറാനെതിരെ വാഷിംഗ്ടൺ നാവിക ഉപരോധം തുടരുമ്പോൾ, തന്ത്രപ്രധാനമായ ഹോർമുസ് കടലിടുക്കിലെ കപ്പൽ ഗതാഗതം ടെഹ്റാൻ തടസ്സപ്പെടുത്തുന്നതും എണ്ണക്കപ്പലുകൾക്ക് നേരെയുള്ള ആക്രമണങ്ങൾ വർദ്ധിക്കുന്നതും മേഖലയിലെ ആശങ്ക കൂട്ടുന്നുണ്ട്.
ഫെബ്രുവരിയിൽ അമേരിക്കയും ഇസ്രായേലും ഇറാനെതിരെ യുദ്ധം ആരംഭിക്കുന്നതിന് മുമ്പ് ആഗോള എണ്ണ-പ്രകൃതിവാതക വിതരണത്തിന്റെ അഞ്ചിലൊന്ന് ഭാഗവും കടന്നുപോയിരുന്നത് ഹോർമുസ് കടലിടുക്കിലൂടെയായിരുന്നു. നിലവിൽ സംഘർഷം അവസാനിപ്പിക്കാൻ ലക്ഷ്യമിട്ടുള്ള സമാധാന ചർച്ചകളിലും ഈ ജലപാതയുടെ സുരക്ഷ പ്രധാന തർക്കവിഷയമായി തുടരുകയാണ്.



