വാഷിങ്ടൺ/മനാമ: പശ്ചിമേഷ്യയിൽ യു.എസ് ഏർപ്പെടുത്തിയ ഉപരോധങ്ങൾക്കിടയിൽ അമേരിക്കയും ഇറാനും തമ്മിലുള്ള സൈനിക ഏറ്റുമുട്ടൽ അതീവ ഗുരുതരമായ അവസ്ഥയിലേക്ക് നീങ്ങുന്നു. ഇറാന്റെ തന്ത്രപ്രധാനമായ ഖേഷ്ം ദ്വീപിന് നേരെ അമേരിക്കൻ സൈന്യത്തിന്റെ സെൻട്രൽ കമാൻഡ് ശക്തമായ “ആത്മരക്ഷാർത്ഥമുള്ള” വ്യോമാക്രമണം നടത്തി. ഹോർമുസിൽ കപ്പൽ ഗതാഗതം നടത്തുന്ന സാധാരണ യാത്രാക്കപ്പലുകൾക്കും അമേരിക്കയുടെ സഖ്യരാജ്യങ്ങളായ കുവൈറ്റ്, ബഹ്റൈൻ എന്നിവയ്ക്ക് നേരെയും ഇറാന്റെ ഭാഗത്തുനിന്നും വ്യാപകമായ മിസൈൽ-ഡ്രോൺ ആക്രമണങ്ങൾ ഉണ്ടായതിന് തൊട്ടുപിന്നാലെയാണ് യു.എസ് തിരിച്ചടിച്ചത്. മേഖലയിലൂടെ കടന്നുപോകുകയായിരുന്ന വാണിജ്യ കപ്പലുകളെ ലക്ഷ്യമിട്ട് ഇറാൻ വിക്ഷേപിച്ച മൂന്ന് അത്യാധുനിക ഡ്രോണുകൾ യു.എസ് കപ്പലുകൾ വെടിവെച്ചിട്ടു. ഇതിന് തൊട്ടുപിന്നാലെയാണ് ഡ്രോണുകളെ നിയന്ത്രിക്കാൻ ഇറാൻ സൈന്യം ഉപയോഗിച്ചിരുന്ന ഖേഷ്ം ദ്വീപിലെ മിലിട്ടറി ഗ്രൗണ്ട് കൺട്രോൾ സ്റ്റേഷൻ യു.എസ് വ്യോമസേന തകർത്തത്.
യു.എസ് ആക്രമണത്തിന് പിന്നാലെ ഇസ്ലാമിക് റവല്യൂഷനറി ഗാർഡ് കോർപ്സ് തങ്ങളുടെ അയൽരാജ്യങ്ങളായ കുവൈറ്റിലേക്കും ബഹ്റൈനിലേക്കും നിരവധി ബാലിസ്റ്റിക് മിസൈലുകളും ഡ്രോണുകളും അയച്ചുകൊണ്ട് കടുത്ത തിരിച്ചടിക്ക് മുതിർന്നു. ബഹ്റൈനിലെ യു.എസ് അഞ്ചാം കപ്പൽപ്പടയുടെ (Fifth Fleet) ആസ്ഥാനം ലക്ഷ്യമിട്ടെത്തിയ മൂന്ന് മിസൈലുകളെ യു.എസിന്റെയും ബഹ്റൈന്റെയും സംയുക്ത വ്യോമപ്രതിരോധ സംവിധാനങ്ങൾ ആകാശത്തുവെച്ച് തന്നെ വിജയകരമായി തകർത്തു. കുവൈറ്റിലെ അമേരിക്കൻ സൈനിക ക്യാമ്പുകൾ ലക്ഷ്യമാക്കി വന്ന രണ്ട് ഇറാനിയൻ മിസൈലുകൾ ലക്ഷ്യസ്ഥാനത്ത് എത്തുന്നതിന് മുൻപ് തന്നെ തകരുകയോ വഴിയിൽ പതിക്കുകയോ ചെയ്തു. തുടർന്ന് കുവൈറ്റിലെ യു.എസ് താവളങ്ങൾക്ക് നേരെ വന്ന മറ്റൊരു കൂട്ടം ഡ്രോണുകളെയും അമേരിക്കൻ പ്രതിരോധ സംവിധാനം വെടിവെച്ചിട്ടു. ഈ കടുത്ത മിസൈൽ പോരാട്ടത്തിൽ അമേരിക്കൻ സൈനികർക്കോ സഖ്യകക്ഷികൾക്കോ ആളപായമൊന്നും റിപ്പോർട്ട് ചെയ്തിട്ടില്ലെന്ന് സെന്റകോം സ്ഥിരീകരിച്ചു.
കഴിഞ്ഞ ഏപ്രിൽ പകുതി മുതൽ ഹോർമുസ് കടലിടുക്ക് വഴി ഇറാനിയൻ തുറമുഖങ്ങളിലേക്ക് പോകുന്ന കപ്പലുകൾക്ക് അമേരിക്ക കടുത്ത ഉപരോധവും കടൽ ഉപരോധവും ഏർപ്പെടുത്തിയിരുന്നു. ഇതിന്റെ ഭാഗമായി കഴിഞ്ഞ ദിവസം ഇറാന്റെ ഖാർഗ് ദ്വീപിലേക്ക് നിർദ്ദേശങ്ങൾ ലംഘിച്ച് കടക്കാൻ ശ്രമിച്ച ബോട്സ്വാന പതാകയുള്ള ‘എം.ടി ലെക്സി’ എന്ന എണ്ണക്കപ്പലിന്റെ എഞ്ചിൻ റൂമിലേക്ക് യു.എസ് യുദ്ധവിമാനം ഹെൽഫയർ മിസൈൽ അയച്ച് തകർത്തിരുന്നു. ഇതിന് പ്രതികാരമായാണ് ഇറാൻ മിസൈൽ ആക്രമണം ശക്തമാക്കിയത്. ഇരുരാജ്യങ്ങളും തമ്മിൽ താൽക്കാലിക വെടിനിർത്തൽ ചർച്ചകൾ പുരോഗമിക്കുന്നതിനിടയിലാണ് ഗൾഫ് മേഖലയെ മുഴുവൻ യുദ്ധഭീതിയിലാഴ്ത്തിയ ഈ പുതിയ സൈനിക ഏറ്റുമുട്ടലുകൾ നടന്നിരിക്കുന്നത്. ഏത് സാഹചര്യത്തെയും നേരിടാൻ തങ്ങളുടെ സൈന്യം സജ്ജമാണെന്ന് അമേരിക്കൻ കമാൻഡ് അറിയിച്ചു.
