തിരുവനന്തപുരം: സംസ്ഥാനത്തെ പ്ലസ് വൺ പ്രവേശനത്തിനുള്ള രണ്ടാം അലോട്ട്മെന്റ് നടപടികൾ പൂർത്തിയായി. ഇതുവരെ ആകെ 2,40,095 വിദ്യാർത്ഥികൾക്ക് അലോട്ട്മെന്റ് ലഭിച്ചതിൽ 2,29,405 പേരാണ് പ്രവേശനം നേടിയത്. ഇതിൽ 1,43,351 വിദ്യാർത്ഥികൾ സ്ഥിരപ്രവേശനവും 86,084 പേർ താൽക്കാലിക പ്രവേശനവുമാണ് എടുത്തത്. അലോട്ട്മെന്റ് ലഭിച്ചിട്ടും 10,431 പേർ പ്രവേശനം നേടാതിരുന്നപ്പോൾ 229 പേരുടെ അപേക്ഷകൾ വിവിധ കാരണങ്ങളാൽ നിരസിക്കപ്പെട്ടു. ഇവർ പ്രവേശനം നേടാതിരുന്ന സീറ്റുകളും രണ്ടാം അലോട്ട്മെന്റിൽ ബാക്കിയുണ്ടായിരുന്നവയും ഉൾപ്പെടെ ഇനി മെറിറ്റ് വിഭാഗത്തിൽ 88,497 സീറ്റുകളാണ് അവശേഷിക്കുന്നത്. ഇത്തവണ ആകെ 4,44,772 വിദ്യാർത്ഥികളാണ് പ്ലസ് വൺ പ്രവേശനത്തിനായി അപേക്ഷ സമർപ്പിച്ചിരുന്നത്. നിലവിലെ കണക്കുകൾ പ്രകാരം 2,15,367 അപേക്ഷകർക്ക് ഇപ്പോഴും അലോട്ട്മെന്റ് ലഭിച്ചിട്ടില്ല. എന്നാൽ മാനേജ്മെന്റ് ക്വാട്ട വഴിയും ഐ.ടി.ഐ ഉൾപ്പെടെയുള്ള മറ്റ് കോഴ്സുകളിലേക്കും പ്രവേശനം നേടിയവരെക്കൂടി കണക്കിലെടുക്കുമ്പോൾ അലോട്ട്മെന്റ് കാത്തിരിക്കുന്നവരുടെ യഥാർത്ഥ എണ്ണത്തിൽ കുറവുണ്ടാകും.
പ്രവേശനത്തിന്റെ മുഖ്യഘട്ടത്തിൽ ഇനി ഒരൊറ്റ അലോട്ട്മെന്റ് കൂടിയാണ് ബാക്കിയുള്ളത്. നിർണ്ണായകമായ ഈ മൂന്നാം അലോട്ട്മെന്റ് ഫലം വരും ഞായറാഴ്ച പ്രസിദ്ധീകരിക്കും. മൂന്നാം അലോട്ട്മെന്റ് ലഭിക്കുന്നവർക്ക് ജൂൺ 29, 30 തീയതികളിൽ സ്കൂളുകളിൽ നേരിട്ടെത്തി പ്രവേശനം നേടാവുന്നതാണ്. പുതിയ അധ്യയന വർഷത്തെ പ്ലസ് വൺ ക്ലാസുകൾ ജൂലൈ ആറിന് ആരംഭിക്കും. അതേസമയം, അർഹരായ അപേക്ഷകരുടെ കുറവ് കാരണം എസ്.സി, എസ്.ടി, ഇ.ഡബ്ല്യു.എസ് തുടങ്ങിയ സംവരണ വിഭാഗങ്ങളിലെ ഭൂരിഭാഗം സീറ്റുകളും ആദ്യ അലോട്ട്മെന്റ് മുതൽ ഒഴിഞ്ഞുകിടക്കുകയാണ്. എസ്.സി, എസ്.ടി സീറ്റുകളിൽ അപേക്ഷകരില്ലാത്ത സാഹചര്യത്തിൽ ഒ.ഇ.സി പട്ടികവർഗ്ഗത്തിലെ 13 വിഭാഗങ്ങളെയും ഒ.ഇ.സി പട്ടികജാതിയിലെ 7 വിഭാഗങ്ങളെയുമാണ് ആദ്യം പരിഗണിക്കുക. അതിനുശേഷവും ഒഴിവുകൾ അവശേഷിക്കുകയാണെങ്കിൽ അവ പൊതു മെറിറ്റായി കണക്കാക്കി ഒ.ബി.സി വിഭാഗത്തിലെ ഈഴവ, മുസ്ലിം, ലത്തീൻ കത്തോലിക്ക, എസ്.ഐ.യു.സി, ആംഗ്ലോ ഇന്ത്യൻ, മറ്റ് പിന്നാക്ക ക്രിസ്ത്യൻ, ഹിന്ദു, വിശ്വകർമ്മ തുടങ്ങിയ വിഭാഗങ്ങളിലെ അപേക്ഷകർക്ക് നിശ്ചിത സംവരണ ക്രമമനുസരിച്ച് നൽകും. ഇതിനുശേഷവും മിച്ചം വരുന്ന സീറ്റുകൾ പൊതുവിഭാഗത്തിലേക്ക് കൈമാറുന്നതായിരിക്കും. അടുത്ത അലോട്ട്മെന്റുകളിലൂടെയാണ് ഈ സീറ്റുകളുടെ വിതരണം പൂർത്തിയാക്കുക. ഇ.ഡബ്ല്യു.എസ് വിഭാഗത്തിൽ മിച്ചം വരുന്ന സീറ്റുകൾ വരാനിരിക്കുന്ന മൂന്നാം അലോട്ട്മെന്റിൽ തന്നെ പൊതുമെറിറ്റിലേക്ക് മാറ്റുന്നതായിരിക്കും.
