കൊച്ചി: സംസ്ഥാനത്ത് രൂക്ഷമായ വൈദ്യുതി പ്രതിസന്ധി പരിഹരിക്കാൻ സർക്കാർ തീവ്രശ്രമം നടത്തുന്നതിനിടെ പ്രശ്നം വഷളാക്കാൻ ശ്രമിക്കുന്ന ചില കെ.എസ്.ഇ.ബി ഉദ്യോഗസ്ഥരുടെ നിലപാടിനെതിരെ മുഖ്യമന്ത്രി വി.ഡി. സതീശൻ കടുത്ത മുന്നറിയിപ്പ് നൽകി. പുനരുപയോഗ ഊർജ്ജത്തോടുള്ള ചില ഉദ്യോഗസ്ഥരുടെ വിമുഖതയും അനാവശ്യമായി വൈദ്യുതി ബന്ധം വിച്ഛേദിക്കുന്ന സമീപനവും അംഗീകരിക്കാനാകില്ലെന്നും അദ്ദേഹം വ്യക്തമാക്കി. കൊച്ചിയിൽ കെ.എസ്.ഇ.ബി സംഘടിപ്പിച്ച എക്സ്പോയിൽ സംസാരിക്കുകയായിരുന്നു മുഖ്യമന്ത്രി.
സൗരോർജ്ജം അടക്കമുള്ള പുനരുപയോഗ ഊർജ്ജത്തിന് പരമാവധി മുൻഗണന നൽകുന്ന സമഗ്രമായ പുതിയ വൈദ്യുതി നയത്തിന് ഉടൻ രൂപം നൽകും. ഹൈഡ്രൽ ഊർജ്ജ ഉത്പാദനം പരിമിതമായ സാഹചര്യത്തിൽ സൗരോർജ്ജം ഉൾപ്പെടെയുള്ള അപരമ്പരാഗത ഊർജ്ജ സ്രോതസ്സുകൾ കൂടുതൽ പ്രയോജനപ്പെടുത്തുക മാത്രമാണ് പ്രതിസന്ധിക്കുള്ള ഏക പരിഹാരം. കഴിഞ്ഞ വർഷത്തേക്കാൾ വൈദ്യുതി ആവശ്യകതയിൽ കടുത്ത വർദ്ധനവാണുണ്ടായിട്ടുള്ളത്. എന്നാൽ ദേശീയതലത്തിൽ പോലും അടിയന്തരമായി വാങ്ങാൻ വൈദ്യുതി ലഭ്യമല്ലാത്ത അവസ്ഥ നിലനിൽക്കുന്നുണ്ട്. സൗരോർജ്ജത്തിന് പ്രാധാന്യം നൽകുന്ന വൈദ്യുതി നയവും പുതിയ റെഗുലേറ്ററി പോളിസിയും ഈ മാസം തന്നെ പ്രാബല്യത്തിൽ വരുമെന്നും ഉത്തരവാദിത്തങ്ങളിൽ നിന്ന് സർക്കാർ ഒളിച്ചോടില്ലെന്നും അദ്ദേഹം കൂട്ടിച്ചേർത്തു.
അതേസമയം, ശനിയാഴ്ച രാത്രി വൈകിയും സംസ്ഥാനത്തിന്റെ വിവിധ ഭാഗങ്ങളിൽ അപ്രതീക്ഷിത വൈദ്യുതി മുടക്കം ജനങ്ങളെ ദുരിതത്തിലാക്കി. പവർകട്ട് മുൻകൂട്ടി അറിയിക്കുമെന്ന വാഗ്ദാനം കെ.എസ്.ഇ.ബി പാലിക്കാത്തതിൽ വ്യാപക പ്രതിഷേധം ഉയരുന്നുണ്ട്. സാങ്കേതിക തകരാറുകൾ മൂലമാണ് മുൻകൂട്ടി അറിയിപ്പ് നൽകാൻ സാധിക്കാത്തതെന്നാണ് അധികൃതരുടെ വിശദീകരണം. കഴിഞ്ഞ ദിവസം രാത്രി 10:15-ഓടെ സംസ്ഥാനത്തെ വൈദ്യുതി ഡിമാൻഡ് 5349 മെഗാവാട്ടായി ഉയർന്നിരുന്നു. കടുത്ത വേനൽകാലത്തിന് സമാനമായ അനിയന്ത്രിതമായ ഈ ഡിമാൻഡ് വരും ദിവസങ്ങളിലും വൈദ്യുതി നിയന്ത്രണം തുടരാൻ കാരണമാകുമെന്ന സൂചനയാണ് നൽകുന്നത്.
