വാഷിംഗ്ടൺ: അന്താരാഷ്ട്ര വിപണിയിൽ ക്രൂഡ് ഓയിൽ വില വീണ്ടും കുതിച്ചുയരുന്നു. വാരാന്ത്യത്തിൽ യു.എസ് വിപണിയിൽ എണ്ണവില ബാരലിന് 100 ഡോളറിന് മുകളിലെത്തി. ഡീസൽ, ബ്രെന്റ് ക്രൂഡ് ഓയിൽ വിലയിലുണ്ടാകുന്ന ഈ പെട്ടെന്നുള്ള വർദ്ധനവ് ആഗോള ഊർജ്ജ വിപണിയിൽ വലിയ രീതിയിലുള്ള ഉലച്ചിൽ സൃഷ്ടിക്കുന്നതായി ജെ.ടി.ഡി എനർജി സർവീസസ് ഡയറക്ടർ ജോൺ ഡ്രിസ്കോൾ അൽ ജസീറയോട് വ്യക്തമാക്കി.
മേഖലയിലെ വർദ്ധിച്ചു വരുന്ന സംഘർഷങ്ങളും പ്രധാന കടൽ മാർഗ്ഗങ്ങൾക്കും കപ്പൽ ഗതാഗതത്തിനും നേരെയുണ്ടാകുന്ന ഭീഷണികളുമാണ് എണ്ണ വിതരണത്തെ ഗുരുതരമായി ബാധിക്കുന്നത്. തന്ത്രപ്രധാനമായ സമുദ്ര പാതകളിലെ അരക്ഷിതാവസ്ഥ ഇന്ധന വിതരണം തടസ്സപ്പെടാനുള്ള സാധ്യത വർദ്ധിപ്പിക്കുന്നുവെന്നും അദ്ദേഹം മുന്നറിയിപ്പ് നൽകി.
ആഗോളതലത്തിൽ ക്രൂഡ് ഓയിൽ വിതരണ ശൃംഖല നേരിടുന്ന ഭീഷണികൾ വരും ദിവസങ്ങളിലും തുടരുകയാണെങ്കിൽ ഇന്ധനവില ഇനിയും ഉയർന്നേക്കാമെന്നാണ് സാമ്പത്തിക വിദഗ്ധരുടെ വിലയിരുത്തൽ. ഇത് വിവിധ രാജ്യങ്ങളിൽ പണപ്പെരുപ്പത്തിനും നിത്യോപയോഗ സാധനങ്ങളുടെ വിലവർദ്ധനവിനും വഴിവെച്ചേക്കും.
