ന്യൂഡൽഹി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് പ്രതിപക്ഷ സഖ്യമായ ഇന്ത്യാ മുന്നണിയുടെ നേതൃത്വത്തിൽ ഡൽഹിയിൽ നടന്ന പ്രതിഷേധ മാർച്ചിൽ വൻ സംഘർഷം. പ്രക്ഷോഭത്തിന് നേതൃത്വം നൽകിയ ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് ജനറൽ സെക്രട്ടറി പ്രിയങ്ക ഗാന്ധി, കേരള മുഖ്യമന്ത്രി വി.ഡി. സതീശൻ തുടങ്ങിയ പ്രമുഖ നേതാക്കളെ പോലീസ് കസ്റ്റഡിയിലെടുത്തു. തെരുവിൽ കിടന്നു പ്രതിഷേധിച്ച പ്രിയങ്ക ഗാന്ധിയെയും രാഹുൽ ഗാന്ധിയെയും പോലീസ് ബലപ്രയോഗത്തിലൂടെയാണ് കസ്റ്റഡിയിലെടുത്ത് മാറ്റിയത്.
കസ്റ്റഡിയിലെടുത്ത രാഹുൽ ഗാന്ധിയെ ആദ്യം ബാരാക്കമ്പ പോലീസ് സ്റ്റേഷനിലേക്കാണ് മാറ്റിയതെങ്കിലും, പുറത്ത് പ്രതിഷേധം ശക്തമായതോടെ കിങ്സ്‌വേ ക്യാമ്പിലേക്ക് മാറ്റുകയും പിന്നീട് വിട്ടയക്കുകയും ചെയ്തു. രാഹുൽ ഗാന്ധിയെ കാണാനായെത്തിയ മുഖ്യമന്ത്രി വി.ഡി. സതീശനെയും എം.പിമാരെയും ബാരാക്കമ്പ സ്റ്റേഷന് പുറത്ത് പോലീസ് 15 മിനിറ്റോളം തടഞ്ഞുവെച്ചു. തങ്ങളെയുകൂടി അറസ്റ്റ് ചെയ്യണമെന്ന് സതീശൻ കർശന നിലപാടെടുത്തതോടെയാണ് പോലീസ് ഇവരെ അകത്തേക്ക് കടത്തിവിട്ടത്. ഇതിനിടെ, രാഹുൽ ഗാന്ധിയുമായി പോയ പോലീസ് വാഹനത്തിന്റെ ടയർ പ്രവർത്തകർ പഞ്ചറാക്കിയതിനെ തുടർന്ന് അരമണിക്കൂറോളം വാഹനം വഴിയിൽ കുടുങ്ങുന്ന സാഹചര്യവുമുണ്ടായി.
പ്രതിഷേധക്കാരെ തടയാൻ ജന്തർ മന്തറിലേക്കുള്ള പ്രധാന പാതകളിൽ പോലീസ് ബാരിക്കേഡുകൾ ഉയർത്തി കനത്ത പ്രതിരോധം തീർത്തു. മാർച്ചിന് ഐക്യദാർഢ്യം പ്രഖ്യാപിച്ചെത്തിയ യൂത്ത് കോൺഗ്രസ്, എൻ.എസ്.യു.ഐ പ്രവർത്തകരെ പോലീസ് ബലം പ്രയോഗിച്ച് നീക്കാൻ ശ്രമിച്ചത് തെരുവിൽ വലിയ ഏറ്റുമുട്ടലിന് കാരണമായി. അതിനിടെ, തെരഞ്ഞെടുപ്പ് കമ്മീഷൻ ആസ്ഥാനത്തേക്ക് നടത്തിയ മാർച്ചിൽ ആകാശവാണി ഭവനിലേക്ക് അതിക്രമിച്ചു കയറിയെന്ന് ആരോപിച്ച് ഡൽഹി പോലീസ് രാഹുൽ ഗാന്ധിക്കെതിരെ എഫ്.ഐ.ആർ ചുമത്തിയിട്ടുണ്ട്. തനിക്കെതിരെ രജിസ്റ്റർ ചെയ്യുന്ന ഓരോ എഫ്.ഐ.ആറും നെഞ്ചിലെ മെഡൽ പോലെയാണെന്നും നിലവിലുള്ള 45 എഫ്.ഐ.ആറുകൾ 100 ആക്കുകയാണ് ലക്ഷ്യമെന്നും രാഹുൽ ഗാന്ധി പ്രതികരിച്ചു.
