റിയാദ്: യെമനിലെ ഹൂതി വിമതരുടെ ആക്രമണങ്ങൾ രൂക്ഷമാകുന്ന സാഹചര്യത്തിൽ, സൗദി അറേബ്യയിലുള്ള തങ്ങളുടെ പൗരന്മാരോട് അതീവ ജാഗ്രത പാലിക്കാൻ യു.എസ് എംബസി നിർദ്ദേശം നൽകി. സാധാരണക്കാരുടെ വിമാനത്താവളങ്ങൾ ഉൾപ്പെടെയുള്ള കേന്ദ്രങ്ങൾ ലക്ഷ്യമാക്കി ഹൂതികൾ ആക്രമണം നടത്തുന്നുണ്ടെന്നും, സൈനിക സംഘർഷം കൂടുതൽ ശക്തിപ്പെടാൻ സാധ്യതയുണ്ടെന്നും എംബസി പുറപ്പെടുവിച്ച സുരക്ഷാ മുന്നറിയിപ്പിൽ വ്യക്തമാക്കി.
സാധ്യമായ വിമാന സർവീസ് റദ്ദാക്കലുകൾ, വ്യോമപാത അടച്ചിടലുകൾ, യാത്രാ തടസ്സങ്ങൾ എന്നിവയെക്കുറിച്ച് പൗരന്മാർ ബോധവാന്മാരായിരിക്കണമെന്ന് യു.എസ് എംബസി അറിയിച്ചു. കൂടാതെ, മുൻകരുതലിന്റെ ഭാഗമായി യെമൻ അതിർത്തിക്ക് സമീപമുള്ള പ്രദേശങ്ങളിലേക്ക് യാത്ര ചെയ്യരുതെന്നും സൗദിയിലുള്ള അമേരിക്കൻ പൗരന്മാരോട് നിർദ്ദേശിച്ചിട്ടുണ്ട്.
