ടെഹ്‌റാൻ: ജൂൺ 17-ന് ഒപ്പുവെച്ച ഇസ്ലാമാബാദ് ധാരണാപത്രം (MoU) അനുസരിച്ചുള്ള വാഗ്ദാനങ്ങൾ നടപ്പിലാക്കാൻ അമേരിക്ക തയ്യാറാകുന്നതുവരെ യു.എസുമായി ഇനി യാതൊരുവിധ ചർച്ചകൾക്കുമില്ലെന്ന് ഇറാൻ. ടെഹ്‌റാൻ മേയർ അലിറേസ സകാനിയാണ് ഇക്കാര്യം വ്യക്തമാക്കിയത്. കരാറിലെ വ്യവസ്ഥകൾ യു.എസ് പൂർണ്ണമായും പാലിക്കാതെ ചർച്ചകളുടെ വാതിൽ തുറക്കില്ലെന്നത് രാജ്യത്തിന്റെ പരമോന്നത നേതൃത്വത്തിന്റെ ഉറച്ച തീരുമാനമാണെന്നും സകാനി പ്രസ്താവിച്ചു.
വാഗ്ദാനങ്ങൾ നൽകിയ ശേഷം അത് പാലിക്കാതെ വാക്കുമാറുന്നത് അമേരിക്കയുടെ സ്ഥിരം രീതിയാണെന്ന് സകാനി കുറ്റപ്പെടുത്തി. ഇരുരാജ്യങ്ങളും തമ്മിലുള്ള യുദ്ധത്തിന് താൽക്കാലിക ശമനം വരുത്തുന്നതിനും ചർച്ചകൾക്ക് തുടക്കമിടുന്നതിനുമായി പാക്കിസ്ഥാന്റെ മധ്യസ്ഥതയിലാണ് ജൂണിൽ ഇസ്ലാമാബാദ് ധാരണാപത്രം ഒപ്പുവെച്ചത്. എന്നാൽ വാഷിംഗ്ടണിന്റെ ഭാഗത്തുനിന്നുള്ള ലംഘനങ്ങൾ ചൂണ്ടിക്കാട്ടി ഇറാന്റെ മുതിർന്ന നേതൃത്വം അമേരിക്കയിലുള്ള അവിശ്വാസം ആവർത്തിച്ചു വ്യക്തമാക്കുകയാണ്. അതേസമയം, ഇറാൻ നേതൃത്വത്തിന്റെ നിലപാടുകൾ വിശ്വസനീയമല്ലെന്നാണ് യു.എസ് പ്രസിഡന്റ് ഡോണാൾഡ് ട്രംപിന്റെ ആരോപണം. ഈ പരസ്പര അവിശ്വാസവും തർക്കങ്ങളും മേഖലയിലെ നയതന്ത്ര സമാധാന ശ്രമങ്ങൾക്ക് വലിയ തിരിച്ചടിയാകുന്നുണ്ട്.
