റിയാദ്: ഇറാൻ പിന്തുണയുള്ള ഹൂതി മിലീഷ്യയെ രാഷ്ട്രീയമായും സാമ്പത്തികമായും നിയമപരമായും ഒറ്റപ്പെടുത്തുന്നതിനും ഭീകരസംഘടനയായി പ്രഖ്യാപിക്കുന്നതിനുമായി അറബ് പാർലമെന്റ് സമഗ്രമായ കർമ്മപദ്ധതിക്ക് രൂപം നൽകി. സൗദി അറേബ്യയ്ക്ക് നേരെയും രാജ്യത്തെ സിവിലിയൻ, സാമ്പത്തിക, തന്ത്രപ്രധാന കേന്ദ്രങ്ങൾക്ക് നേരെയും ഹൂതികൾ നടത്തുന്ന ആവർത്തിച്ചുള്ള ആക്രമണങ്ങളെ ചെറുക്കുന്നതിനായാണ് പ്രാദേശിക-അന്തർദേശീയ തലത്തിലുള്ള ഈ പുതിയ നീക്കമെന്ന് അറബ് പാർലമെന്റ് വെള്ളിയാഴ്ച ‘എക്സ്’ പ്ലാറ്റ്‌ഫോമിലൂടെ പുറത്തിറക്കിയ പ്രസ്താവനയിൽ അറിയിച്ചു.
നയതന്ത്രം, രാഷ്ട്രീയം-സുരക്ഷ, നിയമം, സാമ്പത്തികം എന്നീ നാല് പ്രധാന മേഖലകളെ കേന്ദ്രീകരിച്ചാണ് കർമ്മപദ്ധതി തയ്യാറാക്കിയിരിക്കുന്നത്. ആദ്യഘട്ടമായ നയതന്ത്ര തലത്തിൽ, യു.എൻ സുരക്ഷാ കൗൺസിലിലെ അഞ്ച് സ്ഥിരാംഗങ്ങളുടെ (അമേരിക്ക, റഷ്യ, ചൈന, ബ്രിട്ടൻ, ഫ്രാൻസ്) പാർലമെന്റുകളുമായി നേരിട്ട് ബന്ധപ്പെട്ട് ഹൂതി ആക്രമണങ്ങൾ തടയാനും അവർക്ക് ലഭിക്കുന്ന ആയുധ-സാമ്പത്തിക സഹായങ്ങൾ ഇല്ലാതാക്കാനും അന്താരാഷ്ട്ര പിന്തുണ തേടും. രണ്ടാമത്തെ രാഷ്ട്രീയ-സുരക്ഷാ തലത്തിൽ, ഹൂതികളെ ഇതുവരെ ഭീകരസംഘടനയായി പ്രഖ്യാപിക്കാത്ത രാജ്യങ്ങളെയും യൂറോപ്യൻ യൂണിയൻ ഉൾപ്പെടെയുള്ള അന്താരാഷ്ട്ര സംഘടനകളെയും അതിനായി പ്രേരിപ്പിക്കും. ഇതിനായി യൂറോപ്യൻ പാർലമെന്റ് പ്രസിഡന്റ് റോബർട്ട മെറ്റ്‌സോള, യൂറോപ്യൻ യൂണിയൻ വിദേശകാര്യ മേധാവി കാജ കല്ലാസ് എന്നിവരുമായി ചർച്ചകൾ നടത്തി ഹൂതി നേതാക്കളുടെയും അനുബന്ധ സ്ഥാപനങ്ങളുടെയും ആസ്തികൾ മരവിപ്പിക്കാനും ഉപരോധം കടുപ്പിക്കാനും നടപടികൾ സ്വീകരിക്കും.
മൂന്നാമത്തെ നിയമ തലത്തിൽ, ഹൂതികൾ നടത്തിയ യുദ്ധക്കുറ്റങ്ങളും മനുഷ്യാവകാശ ലംഘനങ്ങളും രേഖപ്പെടുത്തിയ സമഗ്രമായ ഫയൽ തയ്യാറാക്കി അന്താരാഷ്ട്ര ക്രിമിനൽ കോടതി (ICC) പ്രോസിക്യൂട്ടറുടെ ഓഫീസിൽ സമർപ്പിക്കും. കുറ്റവാളികൾ ശിക്ഷയിൽ നിന്ന് രക്ഷപ്പെടുന്നില്ലെന്ന് ഉറപ്പാക്കാൻ ബന്ധപ്പെട്ട രാജ്യങ്ങൾ നിയമനടപടികൾ സ്വീകരിക്കണമെന്നും പദ്ധതി ആവശ്യപ്പെടുന്നു. നാലാമത്തെ സാമ്പത്തിക തലത്തിൽ, ഹൂതികളുടെ സൈനിക നീക്കങ്ങൾക്ക് പണം കണ്ടെത്തുന്ന കള്ളക്കടത്ത് ശൃംഖലകൾ, ബിനാമി കമ്പനികൾ, സാമ്പത്തിക ഇടപാടുകൾ എന്നിവ കണ്ടെത്തി പൂർണ്ണമായും തടയും. ഹൂതികളുടെ ആക്രമണങ്ങൾ സൗദിയുടെ സുരക്ഷയ്ക്ക് മാത്രമല്ല, അന്താരാഷ്ട്ര കപ്പൽ-വ്യോമ ഗതാഗതത്തിനും ആഗോള ഊർജ്ജ വിതരണത്തിനും ഭീഷണിയാണെന്ന് പ്രസ്താവന ചൂണ്ടിക്കാട്ടി.
അറബ് പാർലമെന്റിന്റെ ഈ നീക്കത്തെ റിയാദിലെ ഇൻസ്റ്റിറ്റ്യൂട്ട് ഓഫ് പബ്ലിക് അഡ്മിനിസ്ട്രേഷനിലെ അന്താരാഷ്ട്ര നിയമ വിഭാഗം പ്രൊഫസർ ഡോ. ഒസാമ ഗാനെം അൽ-ഒബൈദി സ്വാഗതം ചെയ്തു. യെമന്റെ നാശത്തിനും മേഖലയുടെ അസ്ഥിരതയ്ക്കും കാരണമാകുന്ന ഹൂതി ഭീകരർക്കെതിരെ അറബ് ലോകം ഒറ്റക്കെട്ടാണെന്ന് തെളിയിക്കുന്ന ശരിയായ ദിശയിലുള്ള ചുവടുവെപ്പാണിതെന്ന് അദ്ദേഹം ‘അറബ് ന്യൂസിനോട്’ പറഞ്ഞു. സൗദി അറേബ്യയ്ക്ക് നേരെ ഹൂതികൾ നടത്തിയ മിസൈൽ-ഡ്രോൺ ആക്രമണങ്ങളെ കഴിഞ്ഞ മാസം ശക്തമായി അപലപിച്ച യൂറോപ്യൻ പാർലമെന്റും, ഹൂതികളെ യൂറോപ്യൻ യൂണിയന്റെ ഭീകരസംഘടനകളുടെ പട്ടികയിൽ ഉൾപ്പെടുത്തണമെന്ന് ആവശ്യപ്പെട്ടിരുന്നു.
