ശ്രീനഗർ: ജമ്മു കശ്മീരിലെ കിഷ്ത്വാർ ജില്ലയിൽ കാണാതായ രണ്ട് സ്‌പെഷ്യൽ പൊലീസ് ഓഫീസർമാരുടെ (എസ്.പി.ഒ) മൃതദേഹങ്ങൾ ദച്ചൻ വനമേഖലയിൽ നടത്തിയ തിരച്ചിലിൽ കണ്ടെത്തി. സ്‌പെഷ്യൽ ഓപ്പറേഷൻസ് ഗ്രൂപ്പിലെ (എസ്.ഒ.ജി) അംഗങ്ങളായ റിഷിപാൽ, ബോബി ചന്ദ് എന്നിവരാണ് കൊല്ലപ്പെട്ടത്. ബസ്‌നാനിൽ വിന്യസിച്ചിരുന്ന സൈന്യത്തിന്റെ ’17 രാഷ്ട്രീയ റൈഫിൾസ്’ സംഘത്തിന് പകരമായി ചുമതലയേൽക്കുന്നതിനായി കിയാർ ദച്ചനിൽ നിന്ന് ബസ്‌നാനിലേക്ക് യാത്ര ചെയ്യുന്നതിനിടെയാണ് ഇവർക്ക് നേരെ വെടിവെപ്പുണ്ടായത്.
ഉച്ചകഴിഞ്ഞ് 3.30-ഓടെ വനമേഖലയിൽ നിന്ന് വെടിയൊച്ച കേട്ടതായി പ്രാഥമിക വിവരങ്ങൾ വ്യക്തമാക്കുന്നു. ഏകദേശം ഇതേ സമയത്ത് തന്നെ സമീപപ്രദേശമായ മർവ മേഖലയിലെ എയർടെൽ മൊബൈൽ സേവനങ്ങളും തടസ്സപ്പെട്ടിരുന്നു. വിവരമറിഞ്ഞ ഉടൻ തന്നെ എസ്.ഒ.ജി സംഘവും സ്റ്റേഷൻ ഹൗസ് ഓഫീസറും പ്രദേശത്തേക്ക് തിരിക്കുകയും, തുടർന്ന് നടത്തിയ പരിശോധനയിൽ വെടിയേറ്റ നിലയിൽ ഇരുവരുടെയും മൃതദേഹങ്ങൾ കണ്ടെത്തുകയുമായിരുന്നു. ഉദ്യോഗസ്ഥരെ തട്ടിക്കൊണ്ടുപോയി കൊലപ്പെടുത്തിയ ഭീകരരെ കണ്ടെത്തുന്നതിനായി സുരക്ഷാ സേന പ്രദേശത്ത് വൻതോതിലുള്ള തിരച്ചിൽ ആരംഭിച്ചിട്ടുണ്ട്.
