കോഴിക്കോട്: മുതിർന്ന കോൺഗ്രസ് നേതാവും മുൻ കോഴിക്കോട് ഡി.സി.സി പ്രസിഡന്റും സംസ്ഥാന ന്യൂനപക്ഷ കമ്മീഷന്റെ പ്രഥമ ചെയർമാനുമായ അഡ്വ. എം. വീരാൻ കുട്ടി (86) അന്തരിച്ചു. ബുധനാഴ്ച പുലർച്ചെയായിരുന്നു അന്ത്യം. പൊതുപ്രവർത്തന രംഗത്തും നിയമരംഗത്തും അരനൂറ്റാണ്ടിലേറെ സജീവ സാന്നിധ്യമായിരുന്ന അദ്ദേഹത്തിന്റെ വിയോഗത്തിൽ സാമൂഹിക-രാഷ്ട്രീയ മേഖലകളിലെ പ്രമുഖർ അനുശോചനം രേഖപ്പെടുത്തി.
കോൺഗ്രസ് പ്രസ്ഥാനത്തിന്റെ ശക്തനായ സംഘാടകനായി കോഴിക്കോട് ജില്ലയിലും മലബാറിലൊട്ടാകെയും ദീർഘകാലം സേവനമനുഷ്ഠിച്ച അദ്ദേഹം കേരള മൈനോറിറ്റി കമ്മീഷന്റെ പ്രഥമ ചെയർമാൻ എന്ന നിലയിൽ ശ്രദ്ധേയമായ നിരവധി തീരുമാനങ്ങൾ കൈക്കൊണ്ടിരുന്നു. പൊതുപ്രവർത്തന രംഗത്ത് ജനകീയ വിഷയങ്ങളിൽ കൃത്യമായ ഇടപെടലുകൾ നടത്തിയിരുന്ന അദ്ദേഹത്തിന്റെ വേർപാട് കോൺഗ്രസ് പ്രസ്ഥാനത്തിനും പൊതുസമൂഹത്തിനും വലിയ നഷ്ടമാണ്.
ഭാര്യ: കോനോത്ത് ഫാതിമ. മക്കൾ: ഫായിസ്, ഫവാസ്, ഫാസിൽ, ഫാരിസ് എം.വി. മരുമക്കൾ: ഫാതിമ ജസ്ബിൻ (പറമ്പൻ എടവണ്ണ), ഷോമിയ (അഞ്ചരക്കണ്ടി), ഫാതിമ താനി (താമരശ്ശേരി). സഹോദരങ്ങൾ: ഉണ്യേൻകുട്ടി, റഹ്മാൻ മധുരകുഴി എന്നിവരാണ്. അഡ്വ. എം. വീരാൻ കുട്ടിയുടെ ഖബറടക്കം രാവിലെ 11.30-ന് കാമശ്ശേരി ജുമാ മസ്ജിദ് ഖബർസ്ഥാനിൽ നടന്നു. രാഷ്ട്രീയ നേതാക്കളും പ്രവർത്തകരും പൊതുജനങ്ങളുമടക്കം വൻ ജനാവലി അദ്ദേഹത്തിന് അന്തിമോപചാരം അർപ്പിച്ചു.
