ദമ്മാം: സൗദി അറേബ്യയിലെ കിഴക്കൻ പ്രവിശ്യയായ അൽ ഖോബാറിൽ കൊല്ലം സ്വദേശിയായ പ്രവാസി മലയാളി ഹൃദയാഘാതത്തെ തുടർന്ന് നിര്യാതനായി. കൊല്ലം ഓച്ചിറ ക്ലാപ്പന മഠത്തിൽ തോപ്പിൽ വീട്ടിൽ സാദത്ത് സലിം (40) ആണ് ഞായറാഴ്ച രാവിലെ ദമ്മാമിൽ വെച്ച് മരണപ്പെട്ടത്.
അൽ ഖോബാറിലെ പ്രമുഖ സ്വകാര്യ കമ്പനിയിൽ സീനിയർ അക്കൗണ്ടന്റായി ജോലി ചെയ്തു വരികയായിരുന്നു അദ്ദേഹം. നാട്ടിൽ അവധി ആഘോഷിച്ച ശേഷം കുടുംബത്തോടൊപ്പം രണ്ടു ദിവസം മുൻപാണ് സാദത്ത് സൗദിയിൽ തിരിച്ചെത്തിയത്. തിരികെ എത്തി തൊട്ടടുത്ത ദിവസങ്ങളിൽ തന്നെയാണ് ദാരുണമായ ഈ വേർപാട് സംഭവിച്ചത്.
തോപ്പിൽ സലീമിന്റെയും മെഹറുനിസ മഠത്തിലിന്റെയും മകനാണ് സാദത്ത്. ഭാര്യ: റാബിയ (പുത്തൻ വീട്ടിൽ). മൂന്നര വയസ്സുള്ള ഐസാ മറിയം ഏക മകളാണ്. മൃതദേഹം നിയമനടപടിക്രമങ്ങൾക്ക് ശേഷം എത്രയും വേഗം നാട്ടിലെത്തിക്കുന്നതിനുള്ള തീവ്രശ്രമങ്ങൾ ബന്ധുക്കളുടെയും പ്രാദേശിക സന്നദ്ധ പ്രവർത്തകരുടെയും നേതൃത്വത്തിൽ നടന്നുവരുന്നു. നാട്ടിലെത്തിക്കുന്ന മൃതദേഹം പിന്നീട് ക്ലാപ്പന ജമാഅത്ത് ഖബറിസ്ഥാനിൽ ഖബറടക്കും.
