ദുബൈ: കഴിഞ്ഞ ജൂണിൽ അമേരിക്കയുമായി ധാരണയിലെത്തിയ ഇടക്കാല കരാറിലെ ഏഴ് നിബന്ധനകൾ പൂർണ്ണമായി അംഗീകരിക്കാതെ അന്താരാഷ്ട്ര കപ്പൽ ഗതാഗതത്തിനായി ഹോർമുസ് കടലിടുക്ക് തുറന്നുകൊടുക്കില്ലെന്ന് ഇറാൻ. നയതന്ത്ര നിർദ്ദേശങ്ങൾക്ക് വാഷിംഗ്ടണിൽ നിന്ന് മറുപടി ലഭിച്ചതിന് പിന്നാലെ, ഇറാൻ പാർലമെന്റ് സ്പീക്കർ മുഹമ്മദ് ബാഖർ ഖാലിബാഫിനെ ഉദ്ധരിച്ച് ഇറാനിയൻ വാർത്താ ഏജൻസിയായ ന്യൂ ന്യൂസ് ആണ് ഞായറാഴ്ച ഇക്കാര്യം റിപ്പോർട്ട് ചെയ്തത്.
മാധ്യമങ്ങൾക്ക് മുന്നിൽ വ്യത്യസ്ത നിലപാടുകൾ പറയുന്ന അമേരിക്കൻ ഭരണകൂടം, അടുത്തിടെ മധ്യസ്ഥർ മുഖേന ചില നിർദ്ദേശങ്ങൾ മുന്നോട്ടുവെച്ചിട്ടുണ്ടെന്ന് ഖാലിബാഫ് വ്യക്തമാക്കി. എന്നാൽ, ചർച്ചകൾ നീട്ടിക്കൊണ്ടുപോകാനും ഏകപക്ഷീയമായ ആവശ്യങ്ങൾ അടിച്ചേൽപ്പിക്കാനുമുള്ള കാലം കഴിഞ്ഞുവെന്ന് വാഷിംഗ്ടൺ മനസ്സിലാക്കണമെന്നും അദ്ദേഹം മുന്നറിയിപ്പ് നൽകി. ഇസ്ലാമാബാദ് ധാരണാപത്രത്തിന്റെ അടിസ്ഥാനത്തിലുള്ള ഏഴ് പ്രധാന നിബന്ധനകൾ പൂർണ്ണമായി പാലിക്കപ്പെടാതെ ഹോർമുസ് കടലിടുക്ക് തുറക്കില്ലെന്ന ഇസ്ലാമിക് റിപ്പബ്ലിക് ഓഫ് ഇറാന്റെ നിലപാട് തികച്ചും വ്യക്തവും ഉറച്ചതുമാണെന്ന് അദ്ദേഹം കൂട്ടിച്ചേർത്തു.
അതിനിടെ, അമേരിക്കയുമായുള്ള സൈനികവും രാഷ്ട്രീയവുമായ തർക്കങ്ങൾക്ക് സൈനികപരമായ പരിഹാരമില്ലെന്ന് ഇറാൻ വിദേശകാര്യ മന്ത്രി അബ്ബാസ് അറാഗ്ചി വിദേശ അംബാസഡർമാരുടെ യോഗത്തിൽ തുറന്നടിച്ചു. ശത്രുക്കൾ വീണ്ടും സൈനിക ഏറ്റുമുട്ടലിന്റെ പാത തിരഞ്ഞെടുക്കുകയാണെങ്കിൽ, മുൻപത്തേക്കാൾ ശക്തമായ തിരിച്ചടിയാകും ഇറാൻ നൽകുകയെന്നും അദ്ദേഹം മുന്നറിയിപ്പ് നൽകി. യുദ്ധത്തിനോ പുതിയ ഉപരോധങ്ങൾക്കോ പരിഹാരം കാണാൻ സാധിക്കില്ലെന്നും, നയതന്ത്ര ചർച്ചകളിലൂടെ മാത്രമേ മുന്നോട്ടുപോകാൻ കഴിയൂ എന്നും അറാഗ്ചി ഓർമ്മിപ്പിച്ചു.
