തെരഞ്ഞെടുപ്പ് കമ്മീഷനെതിരായ പ്രക്ഷോഭം കടുക്കുന്നു; രാഷ്ട്രപതിയെ കാണാൻ ഇന്ത്യാ മുന്നണി

ന്യൂഡൽഹി: തെരഞ്ഞെടുപ്പ് കമ്മീഷന്റെ പ്രവർത്തനങ്ങളിൽ കടുത്ത ആശങ്കയറിയിച്ച് രാഷ്ട്രപതി ദ്രൗപദി മുർമുവുമായി കൂടിക്കാഴ്ച നടത്തുന്നതിനായി പ്രമുഖ പ്രതിപക്ഷ സഖ്യമായ ‘ഇന്ത്യാ’ മുന്നണി അനുമതി തേടി. എന്നാൽ പ്രതിപക്ഷ സഖ്യം നൽകിയ അപേക്ഷയിൽ രാഷ്ട്രപതി ഭവന്റെ ഭാഗത്തുനിന്ന് ഇതുവരെ അന്തിമ തീരുമാനമായിട്ടില്ല. പ്രോട്ടോക്കോൾ മുൻനിർത്തി, തെരഞ്ഞെടുക്കപ്പെട്ട ഒരു ചെറിയ പ്രതിനിധി സംഘം മാത്രമേ രാഷ്ട്രപതിയെ കാണൂ എന്ന് പ്രതിപക്ഷ നേതാക്കൾ വ്യക്തമാക്കിയിട്ടുണ്ട്. കൂടിക്കാഴ്ചയ്ക്കായി ഒന്നിലധികം തീയതികൾ അറിയിച്ചിട്ടുണ്ടെങ്കിലും ഔദ്യോഗിക മറുപടി ലഭിച്ചിട്ടില്ല. 15 നേതാക്കൾക്ക് അനുമതി വേണമെന്നാണ് ഇന്ത്യാ മുന്നണിയുടെ ആവശ്യമെങ്കിലും പ്രതിനിധികളുടെ എണ്ണം 10 ആയി കുറയ്ക്കണമെന്ന് രാഷ്ട്രപതി ഭവൻ നിർദ്ദേശിച്ചതായും ഇത് ഇന്ത്യാ മുന്നണി അംഗീകരിച്ചേക്കുമെന്നുമാണ് വിവരങ്ങൾ.

ലോക്‌സഭാ പ്രതിപക്ഷ നേതാവ് രാഹുൽ ഗാന്ധി, കോൺഗ്രസ് അധ്യക്ഷൻ മല്ലികാർജുൻ ഖാർഗെ, തൃണമൂൽ കോൺഗ്രസ് അധ്യക്ഷയും പശ്ചിമ ബംഗാൾ മുഖ്യമന്ത്രിയുമായ മമതാ ബാനർജി തുടങ്ങിയ പ്രമുഖ നേതാക്കൾ ഈ പ്രതിനിധി സംഘത്തിലുണ്ടാകും. അതേസമയം, വോട്ടർപട്ടിക ക്രമക്കേടുകൾ ആരോപിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രക്ഷോഭം ഡൽഹിയിൽ ഇന്നും കൂടുതൽ ശക്തമാക്കാനാണ് ഇന്ത്യാ മുന്നണി പാർട്ടികളുടെ തീരുമാനം. പ്രക്ഷോഭത്തിൽ നേരിട്ട് പങ്കുചേരുന്നതിനായി പശ്ചിമ ബംഗാൾ മുൻ മുഖ്യമന്ത്രി മമതാ ബാനർജിയും ഇന്ന് ഡൽഹിയിലെത്തും.

പ്രതിപക്ഷ സമരം കണക്കിലെടുത്ത് രാജ്യതലസ്ഥാനത്ത് സുരക്ഷ കടുപ്പിച്ചിട്ടുണ്ട്. 221 കമ്പനികളിലായി 23,000 കേന്ദ്ര സേനാംഗങ്ങളെയാണ് ഇന്നുമുതൽ ഒക്ടോബർ 12 വരെ നഗരത്തിൽ വിന്യസിച്ചിരിക്കുന്നത്. കഴിഞ്ഞ ദിവസം 111 കമ്പനി സേനയെയാണ് വിന്യസിച്ചിരുന്നത്.കഴിഞ്ഞ ദിവസം ഡൽഹിയിൽ നടന്ന പ്രതിഷേധ മാർച്ചിൽ പങ്കെടുത്ത മുഴുവൻ നേതാക്കൾക്കും രാഹുൽ ഗാന്ധി നന്ദി അറിയിച്ചു. പ്രതിപക്ഷത്തിന് നേരെ നടന്ന പോലീസ് അതിക്രമങ്ങളിൽഷേധിച്ച് കോൺഗ്രസ് ഇന്ന് രാജ്യവ്യാപകമായി കരിദിനം ആചരിക്കുകയാണ്.

“കേന്ദ്രസർക്കാരിനും പോലീസിനും ഒരു മാർച്ച് തടയാം, കൂടിക്കാഴ്ചകൾ നിഷേധിക്കാം; എന്നാൽ ജനങ്ങളുടെ ഇച്ഛാശക്തിയെ തടയാൻ അവർക്ക് കഴിയില്ല” എന്ന് രാഹുൽ ഗാന്ധി എക്സിൽ (X) കുറിച്ചു. മുഖ്യ തെരഞ്ഞെടുപ്പ് കമ്മീഷണർ സ്ഥാനത്തുനിന്നും ഗ്യാനേഷ് കുമാർ രാജിവെക്കുന്നത് വരെ പോരാട്ടം തുടരുമെന്നും തങ്ങളെ തടയാൻ നരേന്ദ്ര മോദിക്കോ അമിത് ഷായ്ക്കോ സാധിക്കില്ലെന്നും അദ്ദേഹം കൂട്ടിച്ചേർത്തു.