തിരുവനന്തപുരം: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ കേരള നിയമസഭയിൽ പ്രമേയം കൊണ്ടുവരുന്നു. രാജ്യത്തുടനീളം വലിയ രാഷ്ട്രീയ കോലാഹലങ്ങൾക്കും പ്രതിപക്ഷ പ്രക്ഷോഭങ്ങൾക്കും കാരണമായ വോട്ടർ പട്ടികയിലെ ക്രമക്കേടുകൾക്കും വിവാദങ്ങൾക്കും പിന്നാലെയാണ് സംസ്ഥാന സർക്കാരിന്റെയും നിയമസഭയുടെയും ഭാഗത്തുനിന്നുള്ള ഈ നിർണായക നീക്കം. ഗ്യാനേഷ് കുമാറിന്റെ ഏകപക്ഷീയമായ നടപടികൾക്കും കേന്ദ്ര സർക്കാരിന്റെ ഒത്താശയോടെയുള്ള തെരഞ്ഞെടുപ്പ് കമ്മീഷന്റെ പ്രവർത്തനങ്ങൾക്കുമെതിരെ ശക്തമായ നിലപാട് സ്വീകരിക്കാനാണ് കേരള സർക്കാരിന്റെ തീരുമാനം.
ദേശീയ തലത്തിൽ ഇന്ത്യാ മുന്നണിയുടെ നേതൃത്വത്തിൽ ഗ്യാനേഷ് കുമാറിന്റെ രാജി ആവശ്യപ്പെട്ട് പ്രക്ഷോഭങ്ങൾ ശക്തമാകുന്നതിനിടയിലാണ് കേരള നിയമസഭയും വിഷയത്തിൽ ഔദ്യോഗികമായി പ്രമേയം അവതരിപ്പിക്കുന്നത്. ഇതിനുപുറമെ, ഗ്യാനേഷ് കുമാർ കേരളത്തിൽ പൊതുമരാമത്ത് സെക്രട്ടറിയായിരുന്ന കാലത്തെ പഴയൊരു അഴിമതിക്കേസും ആത്മഹത്യാ പ്രേരണാക്കുറ്റവും സംസ്ഥാന സർക്കാർ പുനരന്വേഷിക്കാൻ ഉത്തരവിട്ടിരിക്കുന്ന പശ്ചാത്തലത്തിൽ, നിയമസഭയിൽ കൊണ്ടുവരുന്ന പ്രമേയം രാഷ്ട്രീയമായി ഏറെ പ്രാധാന്യമുള്ള ഒന്നായി മാറിയിരിക്കുകയാണ്. നാളെ നിയമസഭയിൽ അവതരിപ്പിക്കുന്ന പ്രമേയത്തിന്മേലുള്ള ചർച്ചകളും ഭരണ-പ്രതിപക്ഷ വാദപ്രതിവാദങ്ങളും രാഷ്ട്രീയ കേരളത്തിൽ വലിയ ചർച്ചകൾക്കാണ് വഴിയൊരുക്കുന്നത്.
