കോഴിക്കോട്: ഫറോക്കിൽ 26 വയസ്സുകാരിയായ അതുല്യ ആത്മഹത്യ ചെയ്ത സംഭവത്തിൽ സുഹൃത്തിനെതിരെ നടപടി വേണമെന്ന ആവശ്യവുമായി കുടുംബം രംഗത്തെത്തി. കൊടുങ്ങല്ലൂർ സ്വദേശിനി അനുശ്രീക്കെതിരെയാണ് അതുല്യയുടെ ബന്ധുക്കൾ ഗുരുതരമായ ആരോപണങ്ങൾ ഉന്നയിച്ചിരിക്കുന്നത്. സാമ്പത്തിക തട്ടിപ്പും ഇതിനെത്തുടർന്നുണ്ടായ കടുത്ത മാനസിക സമ്മർദ്ദവുമാണ് യുവതിയുടെ മരണത്തിന് കാരണമായതെന്നാണ് കുടുംബം ആരോപിക്കുന്നത്. കഴിഞ്ഞ തിങ്കളാഴ്ചയാണ് അതുല്യയെ ഫറോക്കിലെ വാടകവീട്ടിൽ തൂങ്ങിമരിച്ച നിലയിൽ കണ്ടെത്തിയത്.
ബിടെക് പഠനത്തിന് ശേഷം ജോലി ചെയ്യുന്നതിനിടെ കൊച്ചിയിൽ വെച്ചാണ് അതുല്യ അനുശ്രീയെ പരിചയപ്പെടുന്നത്. ഈ സൗഹൃദം മുതലെടുത്ത് അനുശ്രീ അതുല്യയിൽ നിന്ന് വൻതോതിൽ പണവും സ്വർണാഭരണങ്ങളും കൈക്കലാക്കിയതായി ബന്ധുക്കൾ പറയുന്നു. നൽകിയ പണവും സ്വർണവും തിരികെ ചോദിച്ചപ്പോൾ അനുശ്രീ തയ്യാറാവാതിരുന്നത് അതുല്യയെ കടുത്ത മാനസിക വിഷമത്തിലാക്കിയിരുന്നു. മരണത്തിന് മുൻപ് അതുല്യ അയച്ച ശബ്ദസന്ദേശങ്ങളിൽ തന്റെ മാനസികാവസ്ഥയെക്കുറിച്ചും സാമ്പത്തിക ഇടപാടുകളെക്കുറിച്ചും വ്യക്തമായ സൂചനകളുണ്ടെന്നാണ് റിപ്പോർട്ട്.
സംഭവത്തിൽ കൃത്യമായ അന്വേഷണം നടത്തണമെന്നും അനുശ്രീക്കെതിരെ ആത്മഹത്യാ പ്രേരണാക്കുറ്റം ചുമത്തി കേസെടുക്കണമെന്നും ആവശ്യപ്പെട്ട് കുടുംബം മുഖ്യമന്ത്രിക്കും ഡിജിപിക്കും പരാതി നൽകാൻ ഒരുങ്ങുകയാണ്. നിലവിൽ ഫറോക്ക് പോലീസ് അസ്വാഭാവിക മരണത്തിന് കേസെടുത്ത് അന്വേഷണം നടത്തിവരികയാണ്. കേസിൽ കൂടുതൽ വ്യക്തത വരുത്തുന്നതിനായി പോലീസ് അതുല്യയുടെ ഫോൺ രേഖകളും ശബ്ദസന്ദേശങ്ങളും വിശദമായി പരിശോധിക്കുന്നുണ്ട്.
