വാഷിംഗ്ടൺ ഡി.സി: ഹോർമുസ് കടലിടുക്കിലെ കപ്പൽ ഗതാഗതത്തിന് സുരക്ഷയൊരുക്കുന്നതിനായി ആസൂത്രണം ചെയ്ത ‘പ്രോജക്റ്റ് ഫ്രീഡം’ എന്ന സൈനിക ദൗത്യം പുനരാരംഭിക്കുന്നതിനെക്കുറിച്ച് ഗൗരവമായി ആലോചിക്കുന്നതായി അമേരിക്കൻ പ്രസിഡന്റ് ഡൊണാൾഡ് ട്രംപ്. ഫോക്സ് ന്യൂസിന് നൽകിയ അഭിമുഖത്തിലാണ് അദ്ദേഹം ഇക്കാര്യം വ്യക്തമാക്കിയത്. ഇറാനുമായി ഒരു അന്തിമ കരാറിലെത്തുന്നത് വരെ സമ്മർദ്ദം തുടരുമെന്നും ഒടുവിൽ അവർക്ക് കീഴടങ്ങേണ്ടി വരുമെന്നും ട്രംപ് പറഞ്ഞു. ഇറാന്റെ പക്കലുള്ള ആണവ ശേഖരം സ്വതന്ത്രമായി കൈകാര്യം ചെയ്യാൻ അവർക്ക് ശേഷിയില്ലെന്നും, അത് സുരക്ഷിതമായി നീക്കം ചെയ്യാൻ അമേരിക്കയുടെ സഹായം വേണമെന്ന് ഇറാനിയൻ പ്രതിനിധികൾ തന്നെ സമ്മതിച്ചിട്ടുണ്ടെന്നും അദ്ദേഹം അവകാശപ്പെട്ടു. വെറും കപ്പലുകൾക്ക് അകമ്പടി സേവിക്കുന്നതിലുപരി വിപുലമായ രീതിയിലായിരിക്കും ഇത്തവണ ദൗത്യം നടപ്പിലാക്കുക. നയതന്ത്ര ചർച്ചകൾക്ക് അവസരം നൽകുന്നതിനായി കഴിഞ്ഞയാഴ്ചയാണ് ഈ ദൗത്യം താൽക്കാലികമായി നിർത്തിവെച്ചിരുന്നത്.
ഇറാൻ സമർപ്പിച്ച പുതിയ സമാധാന നിർദ്ദേശങ്ങളെ “വിഡ്ഢിത്തം നിറഞ്ഞ നിർദ്ദേശം” എന്നാണ് ട്രംപ് വിശേഷിപ്പിച്ചത്. നിലവിലെ വെടിനിർത്തൽ സംവിധാനം വെന്റിലേറ്ററിലാണെന്നും, ഇതിന് അതിജീവിക്കാൻ ഒരു ശതമാനം മാത്രമേ സാധ്യതയുള്ളൂ എന്നും അദ്ദേഹം മാധ്യമപ്രവർത്തകരോട് പറഞ്ഞു. ഇറാന്റെ മറുപടി ട്രംപ് തള്ളിയതോടെ അന്താരാഷ്ട്ര വിപണിയിൽ എണ്ണവില കുതിച്ചുയർന്നു. ബ്രെന്റ് ക്രൂഡ് ഓയിലിന്റെ വില ബാരലിന് 104 ഡോളറിന് മുകളിലെത്തി. പത്ത് ആഴ്ചയായി തുടരുന്ന ഈ സംഘർഷം നീളുന്നതും ഹോർമുസ് കടലിടുക്കിലെ തടസ്സങ്ങളും ആഗോള സമ്പദ്വ്യവസ്ഥയെ വലിയ പ്രതിസന്ധിയിലാക്കുമെന്ന ആശങ്കയാണ് വിപണിയിൽ പ്രതിഫലിക്കുന്നത്. ട്രൂത്ത് സോഷ്യലിലൂടെയാണ് ട്രംപ് ഇറാന്റെ നിർദ്ദേശങ്ങൾ ‘പൂർണ്ണമായും അസ്വീകാര്യമാണ്’ എന്ന് ആവർത്തിച്ച് വ്യക്തമാക്കിയത്.
യുദ്ധം മൂലമുണ്ടായ നാശനഷ്ടങ്ങൾക്ക് ഏകദേശം 270 ബില്യൺ ഡോളർ നഷ്ടപരിഹാരം വേണമെന്നും സ്ട്രാറ്റജിക് സമുദ്രപാതയായ ഹോർമുസ് കടലിടുക്കിന് മേൽ തങ്ങൾക്കുള്ള പരമാധികാരം അംഗീകരിക്കണമെന്നുമാണ് ഇറാൻ മുന്നോട്ടുവെച്ച പ്രധാന ആവശ്യങ്ങൾ. അമേരിക്ക തങ്ങളുടെ നാവിക ഉപരോധം അവസാനിപ്പിക്കണമെന്നും എണ്ണ കയറ്റുമതിക്കുള്ള നിയന്ത്രണങ്ങൾ നീക്കണമെന്നും ഇറാന്റെ അർദ്ധ ഔദ്യോഗിക വാർത്താ ഏജൻസിയായ തസ്നീം റിപ്പോർട്ട് ചെയ്തു. എന്നാൽ ഇറാന്റെ ആണവ കേന്ദ്രങ്ങൾ പൂർണ്ണമായും പൊളിച്ചുനീക്കണമെന്ന അമേരിക്കയുടെ കർശന ആവശ്യം അംഗീകരിക്കാൻ തെഹ്റാൻ തയ്യാറായിട്ടില്ല. അടുത്തയാഴ്ച ട്രംപ് ചൈന സന്ദർശിക്കാനിരിക്കെ, ഇറാന്റെ പ്രധാന എണ്ണ ഉപഭോക്താവായ ചൈനയെ ഉപയോഗിച്ച് കൂടുതൽ സമ്മർദ്ദം ചെലുത്താനാണ് വാഷിംഗ്ടൺ ഇപ്പോൾ ലക്ഷ്യമിടുന്നത്.
