ചെന്നൈ: മുല്ലപ്പെരിയാറിൽ പുതിയ അണക്കെട്ട് നിർമ്മിക്കാനുള്ള കേരള സർക്കാരിന്റെ നീക്കങ്ങളെ ശക്തമായി പ്രതിരോധിക്കുമെന്ന് വ്യക്തമാക്കി തമിഴ്നാട് സർക്കാരിന്റെ നയപ്രഖ്യാപനം. മുഖ്യമന്ത്രി സി. ജോസഫ് വിജയ്യുടെ നേതൃത്വത്തിലുള്ള പുതിയ സർക്കാർ അധികാരമേറ്റ ശേഷമുള്ള തമിഴ്നാട് നിയമസഭയുടെ ആദ്യ സമ്മേളനത്തിലാണ് കേരളത്തിന്റെ ആവശ്യങ്ങളെ പൂർണ്ണമായി തള്ളിക്കൊണ്ടുള്ള നിലപാട് വ്യക്തമാക്കിയത്. സഭയിൽ നയപ്രഖ്യാപന പ്രസംഗം നടത്തിയ ഗവർണർ രാജേന്ദ്ര വിശ്വനാഥ് അർലേക്കറാണ് മുല്ലപ്പെരിയാർ വിഷയത്തിൽ അയൽസംസ്ഥാനവുമായുള്ള തർക്കത്തിൽ തമിഴ്നാടിന്റെ കടുത്ത നിലപാട് ആവർത്തിച്ച് വ്യക്തമാക്കിയത്.
തെക്കൻ തമിഴ്നാട്ടിലെ ജില്ലകളുടെ ജീവനാഡിയാണ് മുല്ലപ്പെരിയാർ അണക്കെട്ടെന്ന് നയപ്രഖ്യാപനത്തിൽ ഗവർണർ ചൂണ്ടിക്കാട്ടി. നിലവിലെ അണക്കെട്ട് ബലപ്പെടുത്തിയ ശേഷം ജലനിരപ്പ് 152 അടിയായി ഉയർത്താമെന്ന് 2014-ൽ സുപ്രീംകോടതി ഉത്തരവിട്ടിട്ടുള്ളതാണ്. എന്നാൽ, അണക്കെട്ട് ശക്തിപ്പെടുത്തുന്നതിനുള്ള അറ്റകുറ്റപ്പണികൾ നടത്താൻ കേരള സർക്കാർ തുടർച്ചയായി അനുമതി നിഷേധിക്കുകയാണെന്നും, പകരം പുതിയ അണക്കെട്ട് എന്ന ആവശ്യത്തിൽ അവർ ഉറച്ചുനിൽക്കുകയാണെന്നും തമിഴ്നാട് കുറ്റപ്പെടുത്തി. കേരളത്തിന്റെ പുതിയ ഡാം നിർമ്മാണത്തിനുള്ള ശ്രമങ്ങളെ തടയാൻ നിയമപരമായും അല്ലാതെയുമുള്ള കർശന നടപടികൾ സ്വീകരിക്കും. അതോടൊപ്പം, നിലവിലെ അണക്കെട്ടിൽ അറ്റകുറ്റപ്പണികൾ പൂർത്തിയാക്കി ജലനിരപ്പ് ഉയർത്താൻ ആവശ്യമായ സംയുക്ത നീക്കങ്ങൾ നടത്തുമെന്നും നയപ്രഖ്യാപനത്തിൽ പറയുന്നു.
കേരളവുമായുള്ള മുല്ലപ്പെരിയാർ തർക്കത്തിന് പുറമെ, അയൽസംസ്ഥാനമായ കർണ്ണാടകയുമായുള്ള ജലവിനിയോഗ വിഷയത്തിലും തമിഴ്നാട് തങ്ങളുടെ നിലപാട് കടുപ്പിച്ചിട്ടുണ്ട്. കാവേരി നദിക്ക് കുറുകെ മേക്കേദാട്ടു അണക്കെട്ട് നിർമ്മിക്കാനുള്ള കർണ്ണാടക സർക്കാരിന്റെ നീക്കങ്ങളെ ചെറുക്കാനും തമിഴ്നാട്ടിലെ കർഷകർക്ക് സമയബന്ധിതമായി വെള്ളം ലഭിക്കുന്നുണ്ടെന്ന് ഉറപ്പാക്കാനും ആവശ്യമായ നിയമനടപടികൾ സ്വീകരിക്കും. കൂടാതെ, തമിഴ്നാട്ടിൽ ജാതി സെൻസസ് നടപ്പാക്കുമെന്ന പ്രഖ്യാപനവും പുതിയ സർക്കാരിന്റെ ആദ്യ നയപ്രഖ്യാപനത്തിൽ ഇടംപിടിച്ചിട്ടുണ്ട്. മുൻ സർക്കാരുകളുടെ അതേ നിലപാട് ആവർത്തിച്ചുകൊണ്ട് മുല്ലപ്പെരിയാർ വിഷയത്തിൽ യാതൊരു വിട്ടുവീഴ്ചയുമില്ലെന്ന് വ്യക്തമാക്കിയ വിജയ് സർക്കാരിന്റെ നയം വരും ദിവസങ്ങളിൽ കേരളവുമായി പുതിയ രാഷ്ട്രീയ-നയതന്ത്ര ചർച്ചകൾക്ക് കാരണമായേക്കും.
