ന്യൂയോർക്ക്: അമേരിക്കൻ രാഷ്ട്രീയത്തിൽ ഇസ്രായേൽ അനുകൂല ഗ്രൂപ്പുകൾക്ക് കനത്ത പ്രഹരമേൽപ്പിച്ചുകൊണ്ട് ന്യൂയോർക്ക് പ്രൈമറി തെരഞ്ഞെടുപ്പിൽ ഡെമോക്രാറ്റിക് പാർട്ടിയുടെ പുരോഗമന വിഭാഗത്തിന് ചരിത്രവിജയം. ന്യൂയോർക്ക് സിറ്റി മേയറും ഡെമോക്രാറ്റിക് സോഷ്യലിസ്റ്റ് നേതാവുമായ സോഹ്റാൻ മംദാനി ഔദ്യോഗികമായി പിന്തുണച്ച മൂന്ന് പ്രധാന കോൺഗ്രസ് സ്ഥാനാർത്ഥികളും വൻ ഭൂരിപക്ഷത്തോടെയാണ് വിജയം വരിച്ചത്. പ്രമുഖ ഇസ്രായേൽ അനുകൂല ലോബിയായ ഐപാക്കിന്റെ സാമ്പത്തിക പിന്തുണയോടെ മത്സരിച്ച പ്രമുഖ ഭരണപക്ഷ നേതാക്കളെ അട്ടിമറിച്ചാണ് ഈ വിജയം എന്നതിനാൽ, ഇത് യു.എസിന്റെ വിദേശനയ രൂപീകരണത്തിൽ വലിയ മാറ്റങ്ങൾക്ക് വഴിതുറക്കുമെന്നാണ് വിലയിരുത്തപ്പെടുന്നത്.
മേയർ മംദാനി പിന്തുണച്ച ബ്രാഡ് ലാൻഡർ, ക്ലെയർ വാൽഡെസ്, ഡാരിയലിസ ആവില ഷെവലിയർ എന്നിവരാണ് പ്രൈമറി തെരഞ്ഞെടുപ്പിൽ തകർപ്പൻ വിജയം നേടിയത്. ഇതിൽ അഞ്ചാം തവണയും മത്സരിച്ച പ്രമുഖ കോൺഗ്രസ് അംഗം അഡ്രിയാനോ എസ്പയറ്റിനെ അട്ടിമറിച്ച 32-കാരിയായ ഡാരിയലിസ ഷെവലിയറുടെ വിജയം രാഷ്ട്രീയ വൃത്തങ്ങളെ അമ്പരപ്പിച്ചു. ഇസ്രായേലിന് നൽകുന്ന യു.എസ് സൈനിക സഹായങ്ങൾ നിർത്തലാക്കണമെന്നും ആ തുക രാജ്യത്തെ ജനങ്ങളുടെ അടിസ്ഥാന ആവശ്യങ്ങൾക്കായി വിനിയോഗിക്കണമെന്നും ശക്തമായി വാദിക്കുന്നവരാണ് വിജയിച്ച മൂന്ന് സ്ഥാനാർത്ഥികളും. “ബോംബുകൾക്കല്ല, കുഞ്ഞുങ്ങൾക്കാണ് പണം വേണ്ടത്” എന്ന ഷെവലിയറുടെ മുദ്രാവാക്യം ജനങ്ങൾക്കിടയിൽ വലിയ സ്വാധീനമാണ് ചെലുത്തിയത്.
തെരഞ്ഞെടുപ്പിൽ കോടിക്കണക്കിന് ഡോളർ ഒഴുക്കി ഇസ്രായേൽ വിരുദ്ധ നിലപാടുള്ളവരെ തോൽപ്പിക്കാൻ ശ്രമിച്ച ഐപാക് പോലുള്ള വലിയ ലോബി ഗ്രൂപ്പുകൾക്കുള്ള കനത്ത തിരിച്ചടിയാണ് ഈ ജനവിധിയെന്ന് രാഷ്ട്രീയ നിരീക്ഷകർ ചൂണ്ടിക്കാണിക്കുന്നു. ‘വർക്കിംഗ് ക്ലാസ്’ ജനവിഭാഗങ്ങളുടെ ആവശ്യങ്ങൾ ഉയർത്തിപ്പിടിച്ചാണ് തങ്ങൾ വിജയിച്ചതെന്നും, പ്രത്യേക താല്പര്യങ്ങളുള്ള ലോബി ഗ്രൂപ്പുകൾക്ക് മുകളിലുള്ള ജനങ്ങളുടെ വിജയമാണിതെന്നും ഫലപ്രഖ്യാപനത്തിന് ശേഷം സോഹ്റാൻ മംദാനി പ്രതികരിച്ചു. വരാനിരിക്കുന്ന നവംബറിലെ മിഡ് ടേം തെരഞ്ഞെടുപ്പിൽ ഡെമോക്രാറ്റിക് പാർട്ടിയുടെ നയങ്ങളെ കൂടുതൽ ഇടതുപക്ഷത്തേക്ക് നയിക്കാൻ ഈ വിജയം കാരണമായേക്കും.
