തിരുവനന്തപുരം: സുപ്രഭാതം പത്രത്തിലെ ലേഖനം, സി.എം.ആർ.എൽ മാസപ്പടി കേസ്, സംസ്ഥാനത്തെ വൈദ്യുതി പ്രതിസന്ധി തുടങ്ങിയ വിവിധ വിഷയങ്ങളിൽ മാധ്യമങ്ങളോട് പ്രതികരിച്ച് വി.ഡി. സതീശൻ. താൻ വിമർശനങ്ങൾക്ക് അതീതനല്ലെന്നും ആർക്കും വിമർശിക്കാനുള്ള അവകാശമുണ്ടെന്നും അദ്ദേഹം വ്യക്തമാക്കി. അതേസമയം, കാന്തപുരം എ.പി. അബൂബക്കർ മുസ്ലിയാർക്കെതിരെ മുൻപ് നടത്തിയ പരാമർശങ്ങളിൽ തന്റെ നിലപാടിൽ മാറ്റമില്ലെന്നും, അത് മാറ്റിപ്പറഞ്ഞിട്ടില്ലെന്നും അദ്ദേഹം കൂട്ടിച്ചേർത്തു.
സി.എം.ആർ.എൽ മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റ് (ഇ.ഡി) സംസ്ഥാന വിജിലൻസിന് നൽകിയ കത്തിന്റെ അടിസ്ഥാനത്തിൽ കൃത്യമായ നിയമനടപടികളുമായി മുന്നോട്ട് പോകുമെന്ന് വി.ഡി. സതീശൻ അറിയിച്ചു. കള്ളപ്പണ നിരോധന നിയമപ്രകാരം കേന്ദ്ര ഏജൻസി അയച്ച കത്തിൽ നിയമോപദേശം തേടിയ ശേഷമായിരിക്കും അടുത്ത നീക്കം. കേസിനെ സി.പി.ഐ.എം ന്യായീകരിക്കുകയാണെന്നും, സംഭാവന പിരിക്കുന്നതിനപ്പുറമുള്ള ഗുരുതര ആരോപണങ്ങളാണ് ഇ.ഡി ചൂണ്ടിക്കാണിച്ചിട്ടുള്ളതെന്നും അദ്ദേഹം പറഞ്ഞു. രാഹുൽ ഗാന്ധിയെ ചോദ്യം ചെയ്തപ്പോൾ കേസിനെ നിയമപരമായി നേരിടുകയും അന്വേഷണത്തോട് സഹകരിക്കുകയുമാണ് ചെയ്തതെന്നും, അല്ലാതെ ഇ.ഡിയുടെ വാഹനം തല്ലിപ്പൊളിക്കാൻ പോയിട്ടില്ലെന്നും അദ്ദേഹം ഓർമ്മിപ്പിച്ചു.
സംസ്ഥാനത്ത് നിലവിലുള്ള വൈദ്യുതി പ്രതിസന്ധിക്ക് കാരണം മുൻപ് ഉമ്മൻചാണ്ടി സർക്കാരിന്റെ കാലത്തെ വൈദ്യുതി കരാർ പിണറായി വിജയൻ സർക്കാർ റദ്ദാക്കിയതാണെന്ന് വി.ഡി. സതീശൻ ആരോപിച്ചു. ഉപഭോഗം കുത്തനെ കൂടിയ സാഹചര്യത്തിൽ പലസമയങ്ങളിലായി വൈദ്യുതി മുടങ്ങുന്നത് മൂലം ഉണ്ടാകുന്ന പ്രയാസങ്ങൾ ഒഴിവാക്കാൻ കൃത്യമായ ഷെഡ്യൂൾ തയ്യാറാക്കാൻ കെ.എസ്.ഇ.ബിക്ക് നിർദേശം നൽകുമെന്ന് അദ്ദേഹം പറഞ്ഞു. കൂടാതെ, ചിറയിൻകീഴിൽ ഉണ്ടായ കൈയാങ്കളി കേസ് പാർട്ടി തലത്തിൽ അന്വേഷിച്ച് ഉചിതമായ നടപടി സ്വീകരിക്കുമെന്നും അദ്ദേഹം കൂട്ടിച്ചേർത്തു.
