തിരുവനന്തപുരം: മാസപ്പടി കേസിൽ എൻഫോഴ്സ്മെന്റ് ഡയറക്ടറേറ്റിന്റെ (ഇ.ഡി) റിപ്പോർട്ടുമായി ബന്ധപ്പെട്ട മാധ്യമപ്രവർത്തകരുടെ ചോദ്യങ്ങൾക്ക് നേരെ കടുത്ത അമർഷവും പ്രകോപനവും പ്രകടിപ്പിച്ച് പ്രതിപക്ഷ നേതാവ് പിണറായി വിജയൻ. വിഷയത്തിൽ മാധ്യമങ്ങൾ ഉന്നയിച്ച ചോദ്യങ്ങൾ പൂർണ്ണമായും തള്ളിക്കളഞ്ഞ അദ്ദേഹം, അന്വേഷണ ഏജൻസികളുടെ രാഷ്ട്രീയ നീക്കങ്ങൾക്ക് മാധ്യമങ്ങൾ കൂട്ടുനിൽക്കുകയാണെന്ന് കുറ്റപ്പെടുത്തി.
ഇ.ഡി വിജിലൻസിന് കൈമാറിയ രേഖകളും മാസപ്പടി കേസ് അന്വേഷണവുമായി ബന്ധപ്പെട്ട വിവരങ്ങളും വാർത്തയായതിനെ തുടർന്നാണ് മാധ്യമപ്രവർത്തകർ പ്രതിപക്ഷ നേതാവിൻറെ പ്രതികരണം ആരാഞ്ഞത്. എന്നാൽ ചോദ്യങ്ങൾ കേട്ട ഉടൻ തന്നെ രോഷാകുലനായ പ്രതിപക്ഷ നേതാവ്, കേന്ദ്ര ഏജൻസികളുടെ അജണ്ട പ്രചരിപ്പിക്കാനാണ് മാധ്യമങ്ങൾ ശ്രമിക്കുന്നതെന്ന് ആരോപിച്ചു. അടിസ്ഥാനരഹിതമായ കാര്യങ്ങൾ ചോദ്യങ്ങളായി ഉന്നയിച്ച് വാറോലകൾക്ക് പ്രചാരം നൽകേണ്ടതില്ലെന്നും അദ്ദേഹം പ്രതികരിച്ചു.
കേസുമായി ബന്ധപ്പെട്ട കാര്യങ്ങളിൽ പാർട്ടിയും സർക്കാരും മുൻപും കൃത്യമായ നിലപാട് വ്യക്തമാക്കിയിട്ടുണ്ടെന്ന് ചൂണ്ടിക്കാട്ടിയ മുൻ മുഖ്യമന്ത്രി, രാഷ്ട്രീയ ലക്ഷ്യങ്ങളോടെയുള്ള പ്രചാരണങ്ങളെ അതിന്റേതായ വഴിക്ക് നേരിടുമെന്നും വ്യക്തമാക്കി. വാർത്താസമ്മേളനത്തിലും പൊതുപരിപാടിക്കിടെയും മാധ്യമങ്ങൾ വിഷയം ആവർത്തിച്ച് ഉന്നയിച്ചതാണ് പിണറായി വിജയനെ പ്രകോപിപ്പിച്ചത്.
