ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടും എസ്.ഐ.ആർ (SIR) നടപടികൾ നിർത്തിവെക്കണമെന്നാവശ്യപ്പെട്ടും ഇന്ത്യാ മുന്നണി നവംബർ ഒന്നിന് സംഘടിപ്പിക്കുന്ന പ്രതിഷേധ റാലിക്ക് കോക്രോച്ച് ജനതാ പാർട്ടി (സി.ജെ.പി) ഔദ്യോഗിക പിന്തുണ പ്രഖ്യാപിച്ചു. രാജ്യത്ത് സ്വതന്ത്രവും നീതിയുക്തവുമായ തിരഞ്ഞെടുപ്പുകൾക്കായി പോരാടുന്ന എല്ലാ സംഘടനകൾക്കും ഐക്യദാർഢ്യം നൽകുമെന്ന് സി.ജെ.പി വാർത്താക്കുറിപ്പിൽ വ്യക്തമാക്കി.
ജനാധിപത്യത്തിന്റെ അടിസ്ഥാന തത്വമനുസരിച്ച് ജനങ്ങളാണ് സർക്കാരിനെ തിരഞ്ഞെടുക്കേണ്ടതെന്നും, മറിച്ച് സർക്കാർ വോട്ടർമാരെ തിരഞ്ഞെടുക്കുന്ന അവസ്ഥയാണ് നിലവിലുള്ളതെന്നും സി.ജെ.പി ചൂണ്ടിക്കാണിച്ചു. എസ്.ഐ.ആർ നടപടികളിലൂടെ ഈ തത്വത്തെത്തന്നെ അട്ടിമറിച്ച മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന് സ്വതന്ത്ര തിരഞ്ഞെടുപ്പുകൾക്ക് മേൽനോട്ടം വഹിക്കാനുള്ള വിശ്വാസ്യത പൂർണ്ണമായും നഷ്ടപ്പെട്ടിട്ടുണ്ടെന്നും, അതിനാൽ കമ്മീഷന്റെ സ്വഭാവം വീണ്ടെടുക്കാൻ അദ്ദേഹത്തിന്റെ രാജി അനിവാര്യമാണെന്നും പാർട്ടി ആവശ്യപ്പെട്ടു.
ഡോ. ബി.ആർ. അംബേദ്കറും പണ്ഡിറ്റ് ജവഹർലാൽ നെഹ്റുവും ഉൾപ്പെടെയുള്ള ഭരണഘടനാ ശില്പികൾ എല്ലാ പൗരന്മാർക്കും തുല്യമായ വോട്ടവകാശം ഉറപ്പാക്കിയത് ജനങ്ങളിൽ വിശ്വാസമർപ്പിച്ചുകൊണ്ടാണെന്ന് സി.ജെ.പി ഓർമ്മിപ്പിച്ചു. എന്നാൽ ഇന്നത്തെ എസ്.ഐ.ആർ നടപടികൾ വോട്ടർ പട്ടികയിൽ നിന്ന് അർഹരായ വോട്ടർമാരെ ഒഴിവാക്കുന്നതിനെക്കുറിച്ചുള്ള ഗുരുതരമായ ആശങ്കകളാണ് ഉയർത്തുന്നത്. പൗരന്മാരുടെ വോട്ടവകാശം സംരക്ഷിക്കുകയെന്നതാണ് തിരഞ്ഞെടുപ്പ് കമ്മീഷന്റെ ഉത്തരവാദിത്തമെന്നും, ജനാധിപത്യ പ്രക്രിയയിൽ നിന്ന് ആളുകളെ ഒഴിവാക്കുന്ന നടപടികൾ അംഗീകരിക്കാനാകില്ലെന്നും പാർട്ടി കൂട്ടിച്ചേർത്തു.
