റിയാദ്: യാത്ര വിലക്കും നിയന്ത്രണങ്ങളും മൂലം സൗദി അറേബ്യയിലെ പ്രവാസികൾ കടുത്ത പ്രതിസന്ധി നേരിടുമ്പോഴും ആശ്വാസമേകി റിയാദ് കെ.എം.സി.സി വെൽഫെയർ വിംഗിന്റെ സജീവ പ്രവ‍ർത്തനം. ഗൾഫ് പ്രവാസികൾ നേരിടുന്ന നിരവധിയായ പ്രശ്നങ്ങളിൽ ഇടപെടുന്നുണ്ടെങ്കിലും പ്രവാസികളുടെ മരണവുമായി ബന്ധപ്പെട്ട നിയമനടപടികളിലും മൃതദേഹങ്ങൾ നാട്ടിലെത്തിക്കുന്നതിലുമാണ് സംഘടന പ്രധാനമായും സേവനമനുഷ്ഠിക്കുന്നത്. മലയാളികൾക്ക് പുറമെ മറ്റ് ഉത്തരേന്ത്യൻ സംസ്ഥാനങ്ങളിൽ നിന്നുള്ള പ്രവാസികൾക്കും വെൽഫെയർ വിംഗ് തണലാകുന്നുണ്ട്.
റിയാദിലെ പ്രത്യേക സാഹചര്യങ്ങളെ തുടർന്ന് വിമാനത്താവളം രണ്ടാഴ്ചത്തേക്ക് താത്കാലികമായി അടച്ചിടുകയും ഇന്ത്യൻ വിമാനക്കമ്പനികൾ സർവീസുകൾ നിർത്തിവെക്കുകയും ചെയ്തതോടെ വലിയ പ്രതിസന്ധിയാണ് മൃതദേഹങ്ങൾ നാട്ടിലെത്തിക്കുന്നതിൽ നേരിട്ടത്. നേരിട്ടുള്ള വിമാന സർവീസുകൾ മുടങ്ങിയതോടെ ദമ്മാം വിമാനത്താവളം വഴി ഏറെ ശ്രമപ്പെട്ടാണ് വെൽഫെയർ വിംഗ് പ്രവർത്തകർ മൃതദേഹങ്ങൾ നാട്ടിലേക്ക് കയറ്റി അയച്ചത്. ഇത് നാട്ടിൽ പ്രിയപ്പെട്ടവരുടെ മൃതദേഹത്തിനായി കാത്തിരുന്ന ബന്ധുക്കൾക്ക് വലിയ ആശ്വാസമായി.
കഴിഞ്ഞ ദിവസങ്ങളിൽ റിയാദിൽ നമസ്കാരത്തിനിടെ മരണപ്പെട്ട ആലപ്പുഴ ആദിക്കാട്ടുകുളങ്ങര സ്വദേശി ഷാജി സലീമിന്റെ മൃതദേഹം മദീനയിൽ ഖബറടക്കുന്നതിന് സ്പോൺസറുമായി ചേർന്ന് ആവശ്യമായ നിയമസഹായങ്ങൾ കെ.എം.സി.സി നൽകിയിരുന്നു. ഇതിനുപുറമെ, പെരിന്തൽമണ്ണ പാലോളിപ്പറമ്പ് സ്വദേശി കമാലുദ്ദീന്റെ മൃതദേഹം നടപടികൾ പൂർത്തിയാക്കി നാട്ടിലേക്ക് അയക്കാനും വെൽഫെയർ വിംഗ് മുന്നിട്ടിറങ്ങിയതായി ഭാരവാഹികളായ റഫീഖ് മഞ്ചേരി, റഫീഖ് ചെറുമുക്ക്, റിയാസ് തിരൂർക്കാട് എന്നിവർ അറിയിച്ചു. ജോലിത്തിരക്കുകൾ മാറ്റിവെച്ച് നിസ്വാർത്ഥ സേവനവുമായി മുന്നോട്ടുപോകുന്ന കെ.എം.സി.സി വെൽഫെയർ വിംഗിന്റെ പ്രവർത്തനങ്ങൾ പ്രവാസി സമൂഹത്തിനിടയിൽ ഏറെ പ്രശംസ പിടിച്ചുപറ്റുന്നുണ്ട്.
