ടെഹ്‌റാൻ: ഇറാന്റെ അധീനതയിലുള്ള ക്വഷ്ം (Qeshm) ദ്വീപിന് മുകളിൽ പറക്കുകയായിരുന്ന യു.എസ് സൈന്യത്തിന്റെ കൂടുതൽ അത്യാധുനിക നിരീക്ഷണ ഡ്രോൺ പിടിച്ചെടുത്തതായി ഇസ്ലാമിക് റെവല്യൂഷണറി ഗാർഡ് കോർപ്സ് (IRGC). തങ്ങളുടെ കൈവശമുള്ള അത്യാധുനിക ഇലക്ട്രോണിക് യുദ്ധമുറകൾ ഉപയോഗിച്ചാണ് അമേരിക്കയുടെ ‘MQM-170’ രഹസ്യാന്വേഷണ ഡ്രോണിന്റെ നിയന്ത്രണം ഏറ്റെടുത്ത് തട്ടിയെടുത്തതെന്ന് ഇറാൻ ഔദ്യോഗിക മാധ്യമമായ ഐ.ആർ.ഐ.ബി റിപ്പോർട്ട് ചെയ്തു. യു.എസിന്റെ നാവിക ഡ്രോൺ പിടിച്ചെടുത്തെന്ന ഇറാന്റെ മുൻ അവകാശവാദം അമേരിക്കൻ സൈന്യം തള്ളിയതിന് തൊട്ടുപിന്നാലെയാണ് പുതിയ അവകാശവാദവുമായി ഇറാൻ രംഗത്തെത്തിയിരിക്കുന്നത്.
ഐ.ആർ.ജി.സിയുടെ എയറോസ്‌പേസ് ഫോഴ്‌സ് നടത്തിയ കൃത്യമായ ഇലക്ട്രോണിക് ഇടപെടലുകളിലൂടെയാണ് അമേരിക്കൻ ശത്രുവിഭാഗത്തിന്റെ ഡ്രോൺ വിജയകരമായി താഴെയിറക്കിയതെന്നും, ഇത് രണ്ടാം തവണയാണ് MQM-170 ടൈപ്പ് ഡ്രോൺ ഐ.ആർ.ജി.സിയുടെ കൈകളിൽ അകപ്പെടുന്നതെന്നും റിപ്പോർട്ടിൽ പറയുന്നു. പേർഷ്യൻ ഉൾക്കടലിലെയും തന്ത്രപ്രധാനമായ ഹോർമുസ് കടലിടുക്കിലെയും വ്യോമാതിർത്തി ലംഘിച്ചാണ് ഡ്രോൺ എത്തിയതെന്നും, തകരാറുകളൊന്നുമില്ലാതെ ഇതിനെ പിടിച്ചെടുക്കാൻ സാധിച്ചതായും ഐ.ആർ.ജി.സി അവകാശപ്പെട്ടു. സംഭവത്തെക്കുറിച്ച് യു.എസ് പ്രതിരോധ വകുപ്പ് ഇതുവരെ ഔദ്യോഗികമായി പ്രതികരിച്ചിട്ടില്ല.
