ന്യൂഡൽഹി: തിരഞ്ഞെടുപ്പ് കമ്മീഷൻ നടപ്പിലാക്കുന്ന എസ്.ഐ.ആറിനെതിരായ പ്രക്ഷോഭങ്ങളിൽ പങ്കെടുത്തതിന് ഡൽഹി പോലീസ് ആവശ്യപ്പെട്ട പീസ് ബോണ്ടിൽ ഒപ്പുവെക്കില്ലെന്ന് ഓൾ ഇന്ത്യ സ്റ്റുഡന്റ്സ് അസോസിയേഷൻ പ്രസിഡന്റ് നേഹ ബോറ വ്യക്തമാക്കി. പോലീസിന്റെ ഈ നോട്ടീസിനെതിരെ നേഹ നൽകിയ ഹർജി ഡൽഹി കോടതി വെള്ളിയാഴ്ച തള്ളിയിരുന്നു.
മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഒക്ടോബർ 16-ന് ന്യൂഡൽഹിയിലെ മണ്ഡി ഹൗസിന് സമീപം നടന്ന പ്രതിഷേധത്തിനിടെയാണ് നേഹ ബോറയെ പോലീസ് കസ്റ്റഡിയിലെടുത്തത്. പിന്നീട് ഇവരെ വിട്ടയച്ചെങ്കിലും, വിലക്ക് ലംഘിച്ച് ആളുകളെ പ്രതിഷേധത്തിന് പ്രേരിപ്പിച്ചുവെന്നാരോപിച്ച് സ്പെഷ്യൽ എക്സിക്യൂട്ടീവ് മജിസ്ട്രേറ്റ് ഇവർക്ക് കാരണം കാണിക്കൽ നോട്ടീസ് നൽകുകയായിരുന്നു. ഭാരതീയ നാഗരിക് സുരക്ഷാ സംഹിതയിലെ (BNSS) 126-ാം വകുപ്പ് പ്രകാരം ഒക്ടോബർ 17-നാണ് പോലീസ് നോട്ടീസ് അയച്ചത്. ഒരു വർഷത്തേക്ക് സമാധാനം പാലിക്കുമെന്ന് ഉറപ്പുനൽകുന്ന 10,000 രൂപയുടെ വ്യക്തിഗത ബോണ്ടും ഒരു ജാമ്യക്കാരനെയും ഹാജരാക്കാനായിരുന്നു നോട്ടീസിലെ നിർദ്ദേശം.
അഭിഭാഷകനായ അഭിക് ചിമ്നി മുഖേനയാണ് നേഹ പോലീസിന്റെ നടപടിക്കെതിരെ ഹർജി നൽകിയത്. പോലീസിന്റെ നോട്ടീസ് തികച്ചും അവ്യക്തവും വസ്തുതാവിരുദ്ധവുമാണെന്ന് ഇവർ ചൂണ്ടിക്കാട്ടിയിരുന്നു. എന്നാൽ ഹർജി കോടതി തള്ളിയെങ്കിലും പീസ് ബോണ്ട് ഒപ്പിട്ടു നൽകാൻ തയ്യാറല്ലെന്ന ഉറച്ച നിലപാടിലാണ് നേഹ ബോറ.
