തിരുവനന്തപുരം: സംസ്ഥാനത്ത് അനുഭവപ്പെടുന്ന രൂക്ഷമായ വൈദ്യുതി പ്രതിസന്ധി പരിഹരിക്കാൻ അടിയന്തര നടപടികൾ സ്വീകരിക്കാൻ മുഖ്യമന്ത്രി വി.ഡി. സതീശൻ നിർദേശം നൽകി. പ്രതിസന്ധി നേരിടുന്നതിനായി ചീഫ് സെക്രട്ടറി ബിശ്വനാഥ് സിൻഹ ഐ.എ.എസ്, കെ.എസ്.ഇ.ബി ചെയർമാനും മാനേജിങ് ഡയറക്ടറുമായ എം.ജി. രാജമാണിക്യം ഐ.എ.എസ് എന്നിവരുമായി മുഖ്യമന്ത്രി അടിയന്തര അവലോകന യോഗം നടത്തി. മുൻഗണനാക്രമത്തിൽ പ്രശ്നപരിഹാരത്തിന് നടപടികൾ വേഗത്തിലാക്കാൻ യോഗത്തിൽ തീരുമാനമായതായി മുഖ്യമന്ത്രി എക്സിലൂടെ അറിയിച്ചു.
എൽനിനോ പ്രതിഭാസത്തെ തുടർന്നുള്ള മഴക്കുറവും വർദ്ധിച്ച അന്തരീക്ഷ താപനിലയും സംസ്ഥാനത്തെ വൈദ്യുതി ഉപഭോഗം മുൻകാലങ്ങളേക്കാൾ ഗണ്യമായി ഉയർത്തിയിട്ടുണ്ട്. സെപ്റ്റംബർ 10ന് രാത്രി രേഖപ്പെടുത്തിയ 5,450 മെഗാവാട്ട് വൈദ്യുതി ഡിമാൻഡ് സാധാരണ വേനൽക്കാലത്തെ ഉപഭോഗത്തിന് തുല്യമാണ്. മുൻവർഷങ്ങളിലെ സെപ്റ്റംബർ മാസത്തെ അപേക്ഷിച്ച് 1,100 മെഗാവാട്ടിന്റെ അധിക വർദ്ധനവാണിത്. കൂടാതെ, മധ്യപ്രദേശിൽ നിന്നുള്ള 200 മെഗാവാട്ടിന്റെ കൈമാറ്റക്കരാർ (SWAP) വഴിയുള്ള വൈദ്യുതി ലഭ്യത നിലച്ചതും പവർ എക്സ്ചേഞ്ചുകളിലെ ദൗർലഭ്യവും പ്രതിസന്ധി ഇരട്ടിയാക്കി.
ദേശീയ തലത്തിൽ ഗ്രിഡ് കൺട്രോളർ ഓഫ് ഇന്ത്യ അറിയിച്ച 12,000 മെഗാവാട്ടിന്റെ കുറവും സെൻട്രൽ ജനറേറ്റിംഗ് സ്റ്റേഷനുകളിൽ നിന്നുള്ള വിതരണത്തിലെ തടസ്സവും സ്ഥിതി ഗുരുതരമാക്കുന്നു. ഉപഭോഗം ഈ രീതിയിൽ തുടർന്നാൽ 900 മുതൽ 1,000 മെഗാവാട്ട് വരെ ലഭ്യതക്കുറവ് ഉണ്ടായേക്കാമെന്ന് കെ.എസ്.ഇ.ബി വ്യക്തമാക്കി. ഈ സാഹചര്യത്തിൽ ഇന്ന് (സെപ്റ്റംബർ 11, വെള്ളിയാഴ്ച) വൈകിട്ട് 6.15 മുതൽ രാത്രി 12.45 വരെയുള്ള സമയങ്ങളിൽ സംസ്ഥാനത്ത് നിയന്ത്രിത പവർകട്ട് ഏർപ്പെടുത്തേണ്ടി വരുമെന്ന് കെ.എസ്.ഇ.ബി മുന്നറിയിപ്പ് നൽകി.
